Ахсынньы 7 күнүгэр А.Ф. Шестаков аатынан улуустааҕы норуот айымньытын Дьиэтин фольклорга специалиһа, кыл кырыыманы ыллатар, саха төрүт үгэстэрин, дорҕоонун тарҕатааччылартан биирдэстэрэ Мария Степановна Григорьева-Маайа үйэ аҥардаах үбүлүөйүнэн «Алгыстаах айар аартык» дьоро киэһэтэ киэҥ сэҥээриилээхтик ааста.
Саха сүргэтэ көтөҕүллэр дьоро киэһэтигэр Үөһээ Бүлүүттэн, Мэҥэ-Хаҥаластан, Чурапчыттан, Дьокуускайтан, Намтан бииргэ алтыһар доҕотторо, тэҥҥэ айар-көҕүлүүр биир эйгэлээхтэрэ, аймах-уруу дьоно муһуннулар. Кылыһах кырыымпа лыҥкыныыр, дьүрүскэн хомус дуорайар, төрүт тойук, дэгэрэҥ эйээрэр умнуллубат кэрэ бэлиэ түгэҥҥэ эҕэрдэ эриэккэһэ этилиннэ, алгыс мааныта ананна, бэлэх бастыҥа туттарылынна.
Үөрүүлээх быһыыга-майгыга Нам улууһун баһылыгын социальнай үлэҕэ солбуйааччыта Егор Протопопов Мария Степановнаҕа Российскай Федерация фольклорун сойууһун «За заслуги в культуре и искусстве РФ» мэтээли, Нам улууһун култуураҕа уонна духуобунас сайдыытын салалтатын начальнига Семен Ядрихинскай Саха Өрөспүүбүлүкэтин «Норуот уус-уран айымньытын сайдыытыгар кылаатын иһин» Үрдүк Бэлиэни, А.Ф. Шестаков аатынан Улуустааҕы норуот айымньытын Дьиэтин директора Константин Колодезников коллектив уонна улуустааҕы Идэлээх сойуус (председатель Александра Парникова) ааттарыттан эҕэрдэ суруктары, кэрэ бэлэхтэри туттардылар.
Айар куттаах Мария Григорьева-Маайа СӨ ырыа айааччыларын сойууһун, «Туллук хаара» Нам улууһун ырыа айааччыларын түмсүүтүн чилиэнэ. Бу киэһэҕэ бэйэтэ айбыт ырыаларын иһитиннэрдэ, кини дьүрүскэнигэр туруоруллубут үҥкүүлэр дайдылар. I-Хомустаах Оҕо искусстватын оскуолатын «Күнчээн» (сал. Туяра Мохова), З.П. Винокуров аатынан Намнааҕы Оҕо искусстватын оскуолатын «Грация» (сал. Саргылана Кудрина), «Ньургуһун» үҥкүү-хор народнай коллективын «Айылҕан» (сал. Мария Попова), «Кыталыына» (сал. Павел Винокуров) үҥкүү ансаабыллара киэргэттилэр.
Үөһээ Бүлүүттэн «Тобуруокап сиэннэрэ» (сал. Индиана Феованова, Сергей Иванов), Мэҥэ-Хаҥаластан «Дьиэрэй» (сал. Ульяна Ефремова, Мария Иванова), Дьокуускайтан «Кыл Саха» (сал. Анна Томская), «Айыы кыһата» (сал. Уруйдаана Харитонова, Ольга Копырина), Намтан «Дорҕоон» (сал. Петр Машников) төрүт дорҕоон бөлөхтөрө,
«Кытыл кыыма» ырыа ансаамбыла (сал. Сардана Захарова), «Олох устун» ВИА (сал. Михаил Перетертов), уонна Мария-Маайа Григорьева салайар «Нам кылыһах», «Сарыада», «Талбаана», «Намылы», «Кылы һаҕабын» фольклорнай бөлөхтөрөр, Чурапчыттан Сардаана Макарова, Үөдэйтэн Геннадий Игнатьев кыттыыны ыллылар.
Уола Марк Петров саксофон, сиэнэ Мирослава Плетинская виолончель инструменнарыгар оонньоон үөртүлэр.
Мария Степановна айар үлэтигэр тирэх буолбут ытыктыыр уһуйааччылара С.А.Зверев-Кыыл Уола аатынан тыйаатыр оркестрын музыкана, «Кыл Саха» төрүт дорҕоон бөлөх салайааччыта, СӨ Үтүөлээх артыыһа Анна Томская, СӨ култууратын Үтүөлээх үлэһитэ, СӨ Ырыа айааччыларын уонна театральнай деятеллэрин сойуустарын чилиэнэ, Христофор Максимов Фондатын чилиэнэ Саргылаана Саввична Адамова-Алтан Кыыс дьоро киэһэ олус сэргэхтик, үрдүк таһымнаахтык, ураты тыыннаахтык ааспытын бэлиэтээтилэр.
Ыҥырыылаах ыалдьыттарга Мария Степановна Григорьева-Маайа «Алгыстаах айар аартык» бастакы кинигэтин бэлэхтээтэ.
Күндү биир идэлээхпит Мария Степановна! Үйэ аҥардаах үбүлүөйгүнэн, айар киэһэҕинэн, бастакы кинигэҥ сүрэхтэммитинэн төлөннөөх эҕэрдэ! Дьаныардаах үлэҥ өссө үрдүктэн үрдүк чыпчааллары дабайар үктэл буоллун диэн алгыс тылбытын аныыбыт! Тус бэйэҕэр, дьиэ кэргэҥҥэр чэгиэн буолуу, үгүс үөрүү, мэлдьи ситиһии эҥэрдэстин, ТОЛОРУ ДЬОЛ ТОСХОЙДУН!
