Ахсынньы ый 3 күнүгэр, Олоҥхо дьиэтигэр, Саха омук героическай эпоһа Олоҥхо, Юнеско билиниитин ылбыта 20 сылыгар, СӨ Олоҥхо декадатын чэрчитинэн, биир дойдулаахпыт С.Г. Алексеев — Уус уола Уустарабыс төрөөбүтэ 125 сылыгар анаммыт «Оллоонноон олорон олоҥхолуох…» диэн оҕолорго биирдиилээн уонна бөлөҕүнэн аһаҕас, олоҥхо толоруутугар бэрт сэргэх күрэх буолан ааста.

Күрэхпитигэр Нам улууһуттан, Горнай улууһун Бэрдьигэстээх, Солоҕон, Кировскай нэһилиэктэриттэн уопсайа 46 оҕо кыттыыны ылла. Күрэхпит дьүүллүүр сүбэтигэр үлэлээтилэр: СӨ култууратын туйгуна, Духуобунас киинин специалиһа — П.ф. Федоров дьүүллүүр сүбэ бэрэссэдээтэлинэн, ССРС култууратын туйгуна, култуура бэтэрээнэ — Е.А. Семенова, Духуобунас киинин специалиһа — Л. Е. Тарасова буолан үлэлээтилэр. Биирдиилээн олоҥхону ааҕыыга Нам улууһуттан А.Ф. Шестаков аатынан Улуустааҕы норуот айымньытын Дьиэтин уус-уран тыл куруһуогун салайааччыта Вера Куличкина-Цыпандина Олоҥхоҕо уһуйар оҕолорун Сунтарова Анжеликаны, Мордовской Юраны, Шадрина Эвильяны кытыннарда.

Биирдиилээн кыттааччыларга 8 сааһыттан 11 сааһыгар диэри  бөлөххө Сунтарова Анжелика — III Үрдэл.

12 сааһыттан 14 сааһыгар диэри бөлөххө — I Үрдэл — Мордовской Юра.

15 сааһыттан 18 сааһыгар диэри — I Үрдэл — Шадрина Эвилья.

Бары кыайыылаахтарга диплом, өйдөбүнньүк плакетка уонна сыаналаах бириистэри туттардылар.
Хас биирдии салайааччы бырааттыы Даниловтар ааттарынан Духуобунас киинин-Олоҥхо дьиэтин аатыттан махтал сурук тутта. «Биһиги төрүт үгэстэрбитин ытыктыыр, сайыннарар буоламмыт омук быһыытынан кэскиллээхпит, күүстээхпит!» — диэн тэрийээччилэр түмүк тылынан бары кыттааччыларыгар, уһуйар салайааччыларга барҕа махталларын эттилэр.

Вера Прокопьевнаҕа уонна кэнчээри ыччаттарбытыгар Анжеликаҕа, Юраҕа, Эвильяҕа истиҥ эҕэрдэ! Инникитин даҕаны элбэх ситиһиини баҕарабыт!