Быйыл Аҕа дойду сэриитин кыттыылааҕа, ССРС култууратын туйгуна, РСФСР култууратын Үтүөлээх үлэһитэ, «Бочуот бэлиэтэ» Орден кавалера, Нам улууһун Ытык киһитэ, самодеятельнай композитор, Саха сиригэр айар-тэрийэр култуура эйгэтигэр бастакынан «Народнай» аат иҥэриллибит «Ньургуһун» үҥкүү-хор коллективын төрүттээччи,  дэгиттэр талааннаах, айар-тэрийэр үлэнэн дьоллонон, олоҕун бүтүннүү норуот сайдыытыгар, дойду үтүө аатын туһугар анаабыт, Нам улууһугар култуура уонна искусства сайдыытыгар дириҥ дьапталы оҥкуллаабыт ытыктыыр киһибит Афанасий Федорович Шестаков төрөөбүтэ 100 сыла.

Онон, Нам киинигэр, республикаҕа идэтийбит народнай коллектив буола үүнэр сыаллаах,  1961 сыллаахха хормейстерынан  Раиса Агапова, балетмейстерынан Роза Кириллова, аккомпаниаторынан Илья Христофоров ананан кэлбиттэрэ уонна Афанасий Федорович талааннаах салайыытынан күүстэх үлэлэр, дьарыктар ыытылланнар, Саха сиригэр аан-маҥнайгынан Нам оройуонугар «Народнай» ааттаах норуот уус-уран айымньытын коллектива баар буолбута. Коллективы «Ньургуһун» диэн сүрэхтээбиттэрэ.

Бүгүн, сэтинньи 28 күнүгэр, А.Ф. Шестаков аатынан Улуустааҕы норуот айымньытын Дьиэтигэр «Ньургуһун» үҥкүү-хор коллективын «Народнай» аатын көмүскүүр айар кэнсиэригэр үҥкүү-ырыа айымньыларын сүгүрүйээччилэрэ муһуннулар.

Дьоро киэһэҕэ «Ньургуһун» үҥкүү-хор народнай коллектив,  «Эрэкэ-дьэрэкэ», «Оҕо саас», «Айылҕан», «Кыталыына» «Кытыйа», «Ситим» «Кэрэ Куо», «Эҥсиэли», «Ырыа Куо» ырыа ансаамбыллара, Анна Нестерева кыттыыны ыллылар.

РФ уопсай үөрэҕириитин Бочуоттаах үлэһитэ, СӨ култууратын уонна үөрэҕириитин туйгуна, СӨ ыччат политикатын туйгуна СӨ Норуот айымньытын Дьиэтин норуот айымньытын салаатын специалиһа Николай Николаевич Терютин, А.Е. Кулаковскай аатынан Норуоттар доҕордоһууларын Дьиэтин «Русь» народнай ансаамбылын салайааччыта Елизавета Владимировна Глаголева, Нам улууһун дьаһалтатын култуураҕа уонна духуобунай сайдыытыгар салалтатын начальнигын солбуйааччыта Александра Николаевна Новгородова  бүгүн «Ньургуһун» үҥкүү-хор коллективын «Народнай» аатын көмүскүүр айар кэнсиэриэгэр эксперт хамыыһыйатыгар үлэлээтилэр.

Бары салайааччыларга, кыттааччыларга, оҕо коллективтарын төрөппүттэригэр, А.Ф. Шестаков аатынан Улуустааҕы норуот айымньытын Дьиэтин үлэһиттэригэр истиҥ эҕэрдэ уонна барҕа махтал! Баҕарабыт айымньылаах үлэҕэ саҥа арыйыылары, саҥа туруоруулары, саҥа сүүрээннэри, саҥа ситиһиилэри!