Сэтинньи 21 күнүгэр Нам улууһун Партизан нэһилиэгэр СӨ култууратын үтүөлээх үлэһитэ, ССРС култууратын туйгуна, норуот ырыаһыта, импровизатор-хомусчут, алгысчыт, олоҥхоһут, Нам улууһун, Таастаах, Бартыһаан нэһилиэктэрин Ытык киһитэ Дмитрий Иванович Кривошапкин төрөөбүтэ 85 сылын үбүлүөйдээх тэрээһинин чэрчитинэн кини суруйбут «Сур соноҕос аттаах Алтан Саар Бухатыыр» олоҥхото күн сирин көрдө.
Саҥа олоҥхо туруоруутун сүрүн көҕүлээччитэ А.Ф. Шестаков аатынан Улуустааҕы норуот айымньытын Дьиэтин Уус-уран тыл маастарыстыбатыгар уһуйааччы Өрөспүүбүлүкэтээҕи Олоҥхо күрэстэрин хас да төгүллээх кыайыылааҕа, Олоҥхо проектарын көхтөөх кыттааччыта, СӨ Үтүөлээх оһуохай этээччитэ, СӨ норуот айымньытын сайдыытыгар кылаатын иһин», «Нам улууһун култууратын сайдыытыгар кылаатын иһин» Үрдүк Бэлиэлэр хаһаайына Вера Куличкина-Цыпандина буолар.
Идэтийбит эйгэтин олоххо киллэриигэ Нам улууһун култуураҕа уонна духуобунас сайдыытыгар салалтата, А.Ф. Шестаков аатынан Улуустааҕы норуот айымньытын Дьиэтин, П.П.Ядрихинскай-Бэдьээлэ аатынан Олоҥхо Дьиэтин, Партизан нэһилиэгин «Хомус» фольклор Дьиэтин, I-Хомустаах нэһилиэгин «Алгыс» норуот айымньытын Дьиэтин, I-Хомустаах Оҕо искусстватын оскуолатын култуура үлэһиттэрин өйөбүллэринэн холбоһуктаах сүҥкэн үлэ төрөөн таҕыста.
Режиссер — СӨ култууратын туйгуна, А.Ф. Шестаков аатынан Улуустааҕы норуот айымньытын Дьиэтин режиссера Иван Новиков. Режиссер көмөлөһөөччүтэ — Арктикатааҕы култуура уонна искусства институутун студентката Нюргустаана Лебедева. Туруоруу саамай сүрүнэ, тутула буоллулар — норуот артыыстара. Ол курдук, иэйэн-куойан туран оруолларга оонньоотулар: Партизан нэһилиэгин олохтоохторо Алтан Саар Бухатыыр оҕо сааһын Тургун Саввин, Байдам Турантаев, Намыына — Нария Саввина, Кэрэ Куо — Варя Шарапова, абаһы кыыһа — Марианна Сивцева, суор — Ньургуйаана Сысолятина, Сэгэй Эмээхсин — Елена Маркова оруолларын итэҕэтиилээхтик оонньоотулар. Ону сэргэ «Дьүрүл» народнай ансаамбыл сүрүн састааба уонна эдэр көлүөнэтэ (сал. Мария Аргунова, Татьяна Афанасьева), «Сайбай» чабырҕахсыттар бөлөхтөрө (сал. Альбина Алексеева), «Дайыы» уонна «Күрүлгэн» үҥкүү ансаамбыллара (сал. Ньургуйаана Сысолятина).
Нам кииниттэн П.П.Ядрихинскай-Бэдьээлэ аатынан Олоҥхо Дьиэтин үлэһиттэрэ Бурха Боотур — Владимир Сыромятников, Алтан Саар Бухатыыр — Руслан Павлов, «Ай-Ледис», «Амаана», «Үргэл» үҥкүү ансаамбыллара (сал. Римма Татаринова), Хомустаах Бастакы нэһилиэгин «Алгыс» норуот айымньытын Дьиэтин үлэһиттэрэ абааһы кыыһа — Алена Руфова, Алтан Саар Бухатыыр — Константин Борисов, Дуолан Кырдьаҕас — Вячеслав Константинов, Сорук-Боллур уонна Өһөх Харбыыр — Хомустаахтааҕы Оҕо искусстватын оскуолатын уһуйааччыта Урсун Винокуров.
Олоҥхоһут — СӨ Үтүөлээх оһуохай этээччитэ, Намнааҕы народнай театр артыыһа, «Нам кылыһах» төрүт дорҕоон бөлөҕүн кыттааччыта Владимир Осипов, Ай-Тыл» фольклорнай бөлөх кыттааччылара абааһы кыыһа — Ньургустаана Лебедева, Кээтээнэ Удаҕан — З.П. Винокуров аатынан Намнааҕы оҕо искусстватын оскуолатын уһуйааччыта, «Нам кылыһах» төрүт дорҕоон бөлөҕүн солистката Сахаайа Колодезникова.
Музыканан киэргэтии:
Сергей Акимбетов, Руслан Павлов (П.П.Ядрихинскай-Бэдьээлэ аатынан Олоҥхо Дьиэтэ), Михаил Перетертов, Владимир Куличкин-Цыпандин (А.Ф. Шестаков аатынан Улуустааҕы норуот айымньытын Дьиэтэ), «Нам кылыһах» төрүт дорҕоон бөлөҕүттэн Руслан Захаров
Видеоконтент — Иннокентий Кривошапкин, Николай Кривошапкин
Уот-күөс — Симонд Сивцев
Художник-дизайнер, грим — Алена Дьяконова
Диктор, грим — Анна Слепцова
Сценарий Елена Маркова, Алтыына Шапошникова
Көстүүмнэр — Вера Колапшникова (П.П.Ядрихинскай-Бэдьээлэ аатынан Олоҥхо Дьиэтин директора), Семен Алексеев («Хомус» фольклор Дьиэтин директора)
Бу проект уопсайа 83 артыыһы, 150 көрөөччүнү хапта. «Киһи дууһатын таарыйар олоҥхо буолан тахсан сүргэбитин көтөхтө» диэн Партизан олохтооҕо Полина Скрябина көрөөччүү быһыытынан санаатын үллэстэр.
Хас биирдии этюд, хас биирдии реквизит, уотунан-музыканан киэргэтии, грим толоруллуута А.Ф. Шестаков аатынан Улуустааҕы норуот айымньытын Дьиэтин үлэһиттэрин кыһамньылаах, айымньылаах үлэлэрин түмүгэ буолар.
Проект көҕүлээччитэ Вера Прокопьевна, режиссер Иван Степанович, А.Ф. Шестаков аатынан Улуустааҕы норуот айымньытын Дьиэтин коллектива Дмитрий Иванович Кривошапкин «Сур соноҕос аттаах Алтан Саар Бухатыыр» олоҥхотун бары кыттааччыларыгар, өйөөбүт бары биир идэлээхтэригэр, көрөөччүлэргэ барҕа махталларын тиэрдэллэр. Инникитин даҕаны биир сомоҕо буолан, олохтоох ааптардарбыт айымньыларын арыйан, сырдатан, үйэтитэ туруоҕуҥ!
