Нам улууһугар талба талааннаах кыргыттар, ийэлэр, эйэҕэс эбээлэр үгүстэр. Нэһилиэк олоҕор-дьаһаҕар көхтөөхтүк кыттан, дьиэ кэргэҥҥэ, оҕолоругар, сиэннэригэр кэрэҕэ тардыһар, үтүөнү түстүүр холобурдаахтар.
Нэһилиэк, улуус общественнай тэрээһиннэригэр, ырыа күрэхтэригэр Нам улууһуттан «Ай-Ыллаа» ансаамбыл үгүстүк ааттанар. Атын-атын идэлээх, атын-атын эйгэҕэ үлэлиир кыргыттары биир иэйии түмэр — ол ырыа буолар. Ансаамбыл 2020 сылтан тэриллибитэ. Түбүктээх үлэттэн бириэмэни сөпкө аттаран, олох кэрэтин туойа ырыаҕа дьарыктаналлар, дьону-сэргэни сырдыкка угуйаллар, улууспут аатын ситиһиилэринэн ааттаталлар.
Алтынньы 24 күнүгэр А.Ф.Шестаков аатынан Улуустааҕы норуот айымньытын дьиэтигэр «Ай-Ыллаа» вокальнай ансаамбыл 5 сыллаах үлэтин айар кэнсиэригэр үрдүк таһымҥа ааста.
Кыттыыны ыллылар: Саха эстрадатын ырыаһыттара Николай Андросов, Алексей Потапов, Константин Степанов, Наммыт улууһун маанылаах куоластара — Артём Тюкянов, Сандр Находкин-Сандаар, виртуоз-хомусчут Сахаайа Колодезникова, Хатырыктан «Махсыым уолаттара» бөлөх, Бөтүҥтэн «Дархан» вокальнай ансаамбыл. Ыытааччылар — СӨ Ырыа айааччыларын сойууһун чилиэнэ Анастасия СОЛОВЬЁВА, П.П. Ядрихинскай-Бэдьээлэ аатынан Олоҥхо Дьиэтин эдэр кэскиллээх специалиһа Руслан ПАВЛОВ.
Бэлиэ киэһэҕэ «Ай-Ыллаа» ырыа ансаамбылын бары кыттааччыларыгар Нам улууһун баһылыга Юрий Слепцов, Саха Өрөспүүбүлүкэтин Ил Дарханын, Бырабыыталыстыбатын администрациятын олохтоох бэйэни салайыныы Департаменын салайааччыта Иван Попов, Ленскэй нэһилиэк баһылыга Петр Сокольников, улуус култуура уонна духуобунай сайдыы управлениетын начальнига Семен Ядрихинскай, А.Ф. Шестаков аатынан Улуустааҕы норуот айымньытын Дьиэтин дириэктэрэ Константин Колодезников, ансаамбыл кэрэ куоларын оҕолоро, аймахтара, тэрилтэлэрэ эҕэрдэлэрин тиэртилэр, наҕараадалары туттардылар.
Бииртэн биир кэрэ ырыаларынан «Ай-Ыллаа» ансаамбылы көрөөччү дохсун ытыс тыаһынан көрүстэ. Чаҕылхай көстүүмнэр, уот-күөс, экраҥҥа видеонан, хаартыскаанан көрдөрүүлэр хас биирдии кэлбит көрөөччүгэ ырыа ансаабыла хайдах үүнэн тахсыбытын арыйдылар.
Бу курдук, Нам улууһун көрөөччүлэрэ, ыҥырыылаах ыалдьыттара, ырыа алыптаах эйгэтигэр куустардылар, дуоһуйа сынньаннылар.
