Балаҕан ыйын 10 күнүгэр Нам улууһун Искра нэһилиэгэр «Үтүө санаа сардаҥалара» диэн Искра нэһилиэгиттэн анал байыаннай дьайыы кыттыылаахтарын дьиэ кэргэттэригэр көмө акция тэрээһинэ ыытылынна. Нэһилиэк баһылыгын солбуйааччыта Ольга Белолюбская, П.П. Ядрихинскай-Бэдьээлэ аатынан Олоҥхо Дьиэтин уус-уран салайааччыта Туяра Мегина нэҺилиэк олохтоохторун биир сомоҕоҕо түмүү, буойуннар хорсун быһыыларын үйэтитии, эйэлээх олох туругурарын туһугар биир санааны үөскэтэр сүрүн соруктаах буойуттар дьиэ кэргэттэригэр көмө акция тэрээһинин арыйдылар. А.Ф.Шестаков аатынан Улуустааҕы норуот айымньытын Дьиэтин уус-уран тыл маастарыстыбатыгар уһуйааччы-специалист Вера Куличкина-Цыпандина үс түһүмэхтээн күрэхтэри иилээн-салайан ыытта.
Ол курдук, икки хамаанда тыаҕа тахсан бэриллибит икки чаас бириэмэтигэр отонноон кэллилэр. Хомуллубут отоннору ыйыыһыннаан баран ыраастааһыҥҥа күрэхтэстилэр. Ыраастаммыт 15 киилэ отон «Алаас» сынньалаҥ киинин директорыгар Мотрена Ивановнаҕа туттарылынна.
Быйылгы күһүммүт түмүктэнэр ичигэс күнүгэр «Алаас» сынньалаҥ киинин үлэһиттэрэ Мотрена Дьяконова, Мария Пятыкина, дьаһалта землеустроителя Дмитрий Парников бэлэмнээбит итии үүттээх чэйдээх, тотоойу астаах остуолларыгар олорон Искра ытыктанар аҕа саастаах олохтооҕо Мария Михайловна Бястинова нэһилиэк историятыттан сырдатта.
Бу кэннэ, үс түһүмэхтээх кылгас көрдөөх оонньуулар ыытылыннылар.
Тэрээһин Нам улууһун оһуохай этээччилэрин «Энсиэли оһуохайа» түмсүүтүн салайааччыта Вера Куличкина-Цыпандина Сомоҕо оһуохайынан түмүктэннэ.
Искрэ нэһилиэгин көхтөөх олохтоохторугар, акция бары кыттыылаахтарыгар — чуолаан ыраас уунан хааччыйбыт Роман Дьяконовка, музыканан киэргэппит Николай Уваровка, ылбаҕай ырыаларын бэлэхтээбит Владимир Куличкин-Цыпандиҥҥа, кииннэммит библиотечнай ситим суоппарыгар Руслан Алексеевка барҕа махтал тиэрдэбит.
