Ытыктабыллаах биир дойдулаахтарым,

Эҥсиэли хочотун ытык-мааны ыалдьыттара!

Нам улууһун салалтатын уонна тус бэйэм ааппыттан эһигини дойдуга Аҕа дойдуну көмүскээччи, Саха сиригэр Ийэ дойдуну көмүскээччи, Нам улууһугар Кыайыы, Нам улууһа тэриллибитэ 95 сылларыгар анаммыт Кыайыы ыһыаҕынан барыгытын итиитик-истиҥник эҕэрдэлиибин!

Бастакы Кыайыы ыһыаҕа 1945 сыл бэс ыйыгар ыытыллыаҕыттан 80 сыл ааста. Өстөөх самнарыллыбытын туһунан сурах эйэ холууба буолан Саха сиригэр көтөн кэлбитин кэннэ, Кыайыыны уруйдаан, эйэлээх халлаан анныгар сайыны көрсө, Кыайыы ыһыаҕа тэриллибитэ. Төһө да сэрии аас-туор сыллара дьон сэниэтин эспитин, ас-таҥас кырыымчыгын иһин Кыайыы ыһыахтара ис сүрэхтэн ыытыллыбыттара.

Нам улууһун нэһилиэктэригэр, алаастарыгар өрөгөйдөөх Кыайыы ыһыаҕа сахалыы сиэринэн-туомунан бэлиэтэммитэрэ. Дьон-сэргэ сэрии ыар сылларын кэннилэригэр хаалларан, дьоллоох күннэр кэлбиттэрэ. Бүгүн ол дьол, ол үөрүү иһин саха уолаттара саа тутан охсуспуттарын, тыылга дьоммут күүстээх үлэҕэ көлөһүннэрин тохпуттарын кэриэстиир ыһыахпыт ыһыллар.

Биһиэхэ, Намнарга, Улуу Кыайыы 80 сылынан ыһыахпыт Нам улууһа тэриллибитэ үбүлүөйдээх 95 сылыгар түбэспитинэн ураты суолталаах, икки бүк эппиэтинэстээх.

Күндү дьонум-сэргэм!

Үбүлүөйдээх сылга саҥа саҕахтары арыйан, төрөөбүт түөлбэбит, чэлгийэ сайдарын туһугар салгыы айыахпыт-тутуохпут. Биһиги улууспут олохтоохторун таһаарыылаах үлэлэринэн, общественнай олоххо көхтөөх кыттыыларынан, дойдуга бэриниилээхтэринэн бары туруоруллубут сыаллары ситиһиэхпит, тапталлаах Аҕа дойдубут, Кыайыы туһугар ыра санааларбытын олоххо киллэриэхпит!

Хас биирдии дьиэ кэргэҥҥэ чэгиэн-чэбдик туругу, этэҥҥэ буолууну, эйэлээх халлааны, дьолу баҕарабын!

Ил-эйэ эҥэрдэстин! Дьол-соргу тосхойдун!

Үрүҥ тунах ыһыаҕынан! Уруй-Айхал!

«Нам улууһа» муниципальнай оройуон

баһылыга

Ю.И. Слепцов.