Ыам ыйын 24-25 күннэригэр Дьоллоох Дьокуускай туонатыгар Доҕордоһуу болуоссатыгар Өрөспүүбүлүкэтээҕи «Куйаар далай түһүлгэ» ыччат оһуохайга күрэҕэр Нам улууһун оһуохай таһаараччы ыччаттара кыттыыны ыллылар. Бэлиэтээн эттэххэ, саҥа саҕалааччылар бастакы холонуулара кыттааччылары уонна тэрийээччилэри биһирэттэ. Нам улууһун Оһуохай түмсүүтүн салайааччыта, СӨ Үтүөлээх оһуохай этээччитэ Вера Куличкина-Цыпандина долгутуулаах күннэргэ дьонун-сэргэтин арыаллаан илдьэ сырытта.
Бу күрэх Саха Өрөспүүбүлүкэтин Бырабыытылыстыбатын өйөбүлүнэн, Саха Өрөспүүбүлүкэтин култуураҕа уонна духуобунай сайдыыга салалтатынан, Өрөспүүбүлүкэтээҕи Норуот айымньытын дьиэтин тэрийиитинэн, Өрөспүүбүлүкэтээҕи Оһуохай түмсүү кыттыылаах ыытылынна.
Манна 12 улуустан: Амма, Бүлүү, Нам, Үөһээ-Бүлүү, Ньурба, Сунтаар, Уус-Алдан, Мэҥэ-Хаҥалас, Уус-Майа, Хаҥалас, Чурапчы, Таатта уонна Дьокуускай куораттан 32 эдэр оһуохай этээччы ыччаттар муһуннулар.
Маҥнайгы күнүгэр Нам улууһуттан Намнааҕы оҕо искусствотын оскуолатын фольклор кылааһын преподавателя Сахаайа Колодезникова уонна П.П. Ядрихинскай-Бэдьээлэ аатынан Олоҥхо дьиэтин специалиһа Руслан Павлов кыттыыны ыллыллар.
Иккис күнүгэр Өрөспүүбүлүкэтээҕи Оһуохай түмсүү салайааччыта Александр Данилов Нам улууһун «Эҥсиэли оһуохайа» түмсүү икки кыттааччытыгар Намтан сэлиэнньэтиттэн Владимир Осиповка, Хомустаах Бастакы нэһилиэгиттэн Ирина Николаеваҕа «Саха Өрөспүүбүлүкэтин Үтүөлээх оһуокай этээччитэ» бэлиэни үөрүүлээх быһыыга-майгыга туттарда.
«Күрэх олус долгутуулаахтык уонна тыҥааһыннаахтык ааста, саҥа ааттар билиннилэр» — диэн дьүүллүүр субэ уонна Өрөспүүбүлүкэтээҕи Норуот айымньытын дьиэтин туһааннаах специалистара эдэр оһуохай этээччы ыччаттар таһымнара үрдээбитин бэлиэтээтилэр.
Нам улууһуттан кыттыыны ылбыт эдэр ыччаттарбытыгар Сахаайа Колодезниковаҕа, Руслан Павловка оһуохай улахан түһүлгэтигэр бастакы ситиһиилээх холонууларынан эҕэрдэ уонна инникитин ситиһиилэри баҕарабыт.
Өрөспүүбүлүкэтээҕи “Куйаар далай түһүлгэ” эдэр ыччакка туһуламмыт оһуохайга күрэҕэ алгыстаах аартыга арыллан, үгэскэ кубулуйан үйэлэртэн үйэлэргэ эдэр көлүөнэ ыччаты ыҥыра-угуйа турдун!
