Нам улууһа Аҕа дойду сэриитигэр Кыайыы 80 сылын өрөгөйдөөхтүк, киэҥ далааһыннаахтык бэлиэтээтэ. Тыыл ветераннарын, оҕо саас диэни билбэккэ улааппыт сэрии оҕолорун эҕэрдэлээтэ, Саха Өрөспүүбүлүкэтин уонна Нам улууһун бочуоттаах Үрдүк Бэлиэлэринэн наҕараадалаата. Сцена ветераннара түмсэннэр айар киэһэлэрэ ыытылынна.
Фотограф, видеограф Мария Гаврильева «Победный тыл» Нам улууһун Ытык кырдьаҕастарын мэтириэттэринэн выставката турда. З.П. Винокуров аатынан Намнааҕы оҕо искусстватын оскуолатын преводавателлэрин народнай оркестра (сал. Анна Федулова) сэрии саҕанааҕы уонна кэннинээҕи ырыалар доҕуһуоллаах үҥкүү тэрилиннэ.
Кыайыы скверыгар буойуттарга анаан Ытык сүгүрүйүү толорулунна, тыыннаах сибэкки дьөрбөтө уурулунна.
Киин уулуссанан өлбөт тыыннаах полк колоннатыгар кырачааннартан саҕалаан ытык кырдьаҕастарга тиийэ нэһилиэнньэ сомоҕолуу хаамта.
Кыайыы параадыгар А.Игнатьев аатынан «Эҥсиэли» стадион көрөөччүлэринэн, күөх хонуута кыттааччыларынан толору туолла.
Улуус бары нэһилиэктэрэ ыччаттарын, үлэ-туруу дьоннорун, ветераннарын кытта кэлэн сомоҕолуу хаамтылар, тэрээһиҥҥэ кыттыыны ыллылар.
Саха саллааттара Аҕа дойду сэриитигэр хорсуннарын, сатабыллаах сонордьут буолалларын, Улуу Кыайыыны ситиһиилэрин иһин Кыайыы уордьаннардаах хас биирдии буойун аата ааттанна.
«Кыайыы сырдык дьаралыга» театрализованнай туруорууга Нам улууһун нэһилиэктэрин оскуола үөрэнээччилэрэ, ыччаттара, тэрилтэ үлэһиттэрэ, айар коллективтара кыттыыны ыллылар. Хас биирдии таҥаһы-сабы, туттар малы култуура үлэһиттэрэ тигэн, сорохторун булан-түмэн, оччотооҕу кэм олоҕо толору итэҕэтиилээхтик көрдөрүлүннэ.
Аас-туор сылларга саха дьахталлара, тулуурдаах кырачааннара уонна оччотооҕу биригэдьиирдэр биир туораахха тиийэ фроҥҥа анаабыт ыар кэмнэрэ умнуллубаттар.
Тыыл кэмигэр Саха сирин салайан олорбут биир дойдулаахпыт, Судаарыстыбаннай уонна политическай деятель Илья Егорович Винокуров норуокка анаабыт үлэлэриттэн түгэнэ көрөөччүлэри үөрэ долгутта.
Олохтоохтор уустаан оҥорбут «Советская Якутия» танка макета өрөгөйдөөх күн үөрүүтүн өссө бүк киэргэттэ. Ол курдук, режиссер Иван Новиков проегынан А.Ф. Шестаков аатынан Улуустааҕы норуот айымньытын дьиэтин үлэһиттэрэ Владислав Аргунов, Николай Винокуров, Андрей Нахов, Марк Тоноев, Игнатий Игнатьев баар матырыйааллартан таҥан, сваркалаан,
Екатерина Слепцова, Марианна Иванова, Светлана Христофорова кырааскалаан, З.П. Винокуров аатынан Намнааҕы оҕо искусстватын преподавателя Ксения Колодезникова кыыһынаан Доминикалыын ойуутун-суругун уруһуйдаан бүтүн хамаанда үлэтэ көрөөччү киэҥ биһирэбилин ылла.
Кыайыы параадын сүрүн режиссера Саха Өрөспүүбүлүкэтин култууратын туйгуна Иван Степанович Новиков. А.Ф. Шестакво аатынан Улуустааҕы норуот айымньытын диэтин коллектива бары кыттааччыларга, өйөөбүт тэрилтэлэргэ, биир идэлээхтэригэр барҕа махталын тиэрдэр.
Бу күн «Полевая кухня» итии аһынан хас биирдии кэлбит көрөөччүнү күндүлээтэ, баянынан үҥкүү сынньалаҥа сүргэни көтөхтө, ветераннарга анаан «Блокада суруктара» спектакль көрдөрүлүннэ.
Ким да умнуллубат! Туох да умнуллубат!
