Ыам ыйын 13 күнүгэр Улуу Кыайыы 80 сылынан Улуустааҕы кииннэммит библиотекаҕа Нам улууһун «Туллук хаара» ырыа айааччыларын общественнай түмсүүтүн салайааччыта Андрей Замятин «КЫАЙЫЫ КЫНАТТААХ ЫРЫАЛАР» ырыанньыга сүрэхтэннэ.
СӨ култууратын туйгуна, Нам улууһун, Ленскэй, Хатыҥ-Арыы нэһилиэктэрин Ытык киһитэ, Россия суруналыыстарын, СӨ ырыа айааччыларын сойуустарын чилиэнэ, хас да ырыа ааптара Андрей Терентьевич Замятин: «Кыайыыны уһансыбыт дьоммут үтүө ааттарын үйэтитиигэ, кинилэр хорсун быһыыларын сырдатыыга араас өрүттээх дьоһун үлэлэри тэтимнээхтик ыытабыт. Ааҕааччы киэҥ эйгэтигэр, ырыаны таптааччыларга, култуура эйгэтин үлэһиттэригэр, үөрэх кыһатын учууталларыгар, иитээччилэригэр, эдэр көлүөнэ ыччакка ананар саҥа кинигэҕэ Нам улууһун композитордарын, ырыа айааччыларын Улуу Кыайыы, сэрии тиэмэтигэр араас кэмнэргэ айбыт 81 ырыалара хомуллан киирдилэр».
Улуу Кыайыыны ырыа эмиэ уһансыбыта. Ол курдук, ССРС суруйааччыларын сойууһун чилиэнэ, Нам улууһуттан төрүттээх Саха сирин чаҕылхай поэта Илья Дорофеевич Винокуров-Чаҕылҕан 1942 сыллаахха «Хайыһар» диэн хоһоону суруйбута. Ити кэмҥэ Саха сиригэр үлэлээбит музыкант-педагог Андрей Филиппович Костин бу хоһооҥҥо матыып айан ырыа гынан көтүппүтэ. Онон «Хайыһар» ырыа Саха сиригэр Кыайыыны аҕалбыт бастыҥ ырыа буолар. Ол иһин ноталаах кинигэни бастакынан «Хайыһар» ырыата арыйар.
Хайыһар биригээдэтин байыаһа, снайпер, поэт, прозаик Алексей Спиридонович Бродников бу ырыа туһунан маннык этэн турар: «Ыарахан күннэргэ «Хайыһар» ырыата биһигини быыһаабыта. Уолаттар бойобуой марш матыыбыгар чугаһатан ыллыыллара. Очочоҕуна сэниэтийэрбит, санаабыт бөҕөргүүрэ. Элбэх саханы бу ырыа өйөөбүтэ, кинилэргэ күүс-сэниэ эппитэ. Бу хоһоон саха дьолугар айыллыбыт.»
Кинигэҕэ Аҕа дойду сэриитин кыттыылааҕа, ССРС култууратын туйгуна, РСФСР култууратын Үтүөлээх үлэһитэ, «Бочуот бэлиэтэ» Орден кавалера, Нам улууһун Ытык киһитэ, самодеятельнай композитор, Саха сиригэр айар-тэрийэр култуура эйгэтигэр бастакынан «Народнай» аат иҥэриллибит «Ньургуһун» үҥүү-хор коллективын төрүттээччи Афанасий Федорович Шестаков «Өрөгөйдүү тур — Кыайыы күнэ», А.Ф. Шестаков аатынан Улуустааҕы норуот айымньытын дьиэтин Фольклорга специалиһа Мария Григорьева-Маайа «Кыайыы күнэ», «Туйгун связист», «Уолаттар ырыалара» уонна «Ньургуһун» үҥкүү-хор народнай коллективын концертмейстера Афанасий Татаринов «Өлбөт-сүппэт полк», «Биир сомоҕо буолуохха» ырыалара киирдилэр.
Ырыа кынаттаах саҥа кинигэ ыччаты патриотическай тыыҥҥа иитиигэ, кэнэҕэски үүнэр көлүөнэ төрөөбүт дойдутун историятын ытыктыыр, харыстыыр буолуутугар туһуланар
Аныгы ырыанньык куар-куодтаах, онон киирэн видео клип, ырыа фонограмматын, минуһун көрүөххэ, истиэххэ сөп.
Ким да умнуллубат! Туох да умнуллубат!
