Нам улууһун ырыа айааччыларын «Туллук хаара» түмсүүтэ сыл ахсын көрөөччүлэргэ хатыламмат ураты айар киэһэлэрин бэлэхтиир. Быйылгы сыл тэрээһинэ — Улуу Кыайыы 80 сылыгар ананна. Ыам ыйын 6 күнүгэр, Нам улууһун ааптардарын айымньыларынан «Кыайыы кынаттаах ырыалар» кэнсиэр-спектакль көрдөрдө.
Кэнсиэр-спектакльга Аҕа дойду сэриитин кэмигэр саха дьонун олоҕо-дьаһаҕа арылынна. Ыар күннэргэ ырыа барахсан сырдыкка угуйара, баҕа санаа туолуутугар кынаттыыра бу ылламмыт ырыаларга кэрэхсэннэ. Салайааччы СӨ култууратын туйгуна, Нам улууһун, Ленскэй, Хатыҥ-Арыы нэһилиэктэрин Ытык киһитэ, Россия суруналыыстарын, СӨ ырыа айааччыларын сойуустарын чилиэнэ, хас да ырыа ааптара Андрей Замятин. Туруорааччы-режиссер СӨ култууратын туйгуна Иван Новиков.
Ыытааччылар — Мария Соловьева (Ийэ оруолун толордо), Екатерина Парникова (кийиит кыыс оруолунан ыытта), Афанасий Татаринов эр киһи оруолун толорон тэрээһин олус иэйиилээхтик ааста.
Бу ылламмыт ырыалар сорҕолоро Андрей Терентьевич «Кыайыы кынаттаах ырыалар» диэн кинигэтигэр ыам ыйын 13 күнүгэр сүрэхтэнэрэ күүтүллэр.
