«Нам улууһа» муниципальнай оройуон баһылыга Юрий Иннокентьевич СЛЕПЦОВ кулун тутар 10 күнүнээҕи 612 №-дээх Дьаһалыгар олоҕуран ыытыллыбыт Аҕа дойду сэриитигэр Улуу Кыайыы өрөгөйдөөх 80 сылын бэлиэтиир «НАМ УЛУУҺА КЫАЙЫЫ СУОЛУНАН» Акция айана ыам ыйын 6 күнүгэр түмүктэннэ.
Д.И.Кривошапкин аатынан «Хомус» фольклор дьиэтигэр оскуола үөрэнээччилэрэ, нэһилиэк ыччаттара, үлэ дьоно уонна ытык кырдьаҕастар кэлэн кыттыыны ыллылар.
«Партизан нэһилиэгэ» ТСТ МН баһылыга Алексей Николаевич Зырянов туос тууйаска кэлэр көлүөнэҕэ анаан суругу туттарда. Нам улууһун ветераннарын Сэбиэтин председателя Софья Дмитриевна Кобякова Нам буойуттарын, ветераннарын, тыыл дьонун, оҕо саас дьолун билбэтэх сэрии оҕолорун аҕынна. П.И. Сивцев аатынан НИЭМ Киновидеоархивын специалиһа Вера Дмитриевна Попова дьоҕус чемодантан экспонаттары кэпсээтэ, «Бастакылар хамсааһыннара» оҕо түмсүүтүн Намнааҕы салаатын специалиһа Анна Ильинична Ядрихинская музыкальнай лотуотугар саала көхтөөхтүк оонньоото. Дмитрий Барабанов уолунаан Святославтыын Кыайыы ырыаларынан көрөөччүлэри эҕэрдэлээтилэр.
Түмүктүүр тэрээһин Нам киинигэр П.П. Ядрихинскай-Бэдьээлэ аатынан Олоҥхо дьиэтигэр ыытылынна. «Ленскэй нэһилиэк» ТСТ МН баһылыга Петр Григорьевич Сокольников киирии тылынан арыйда уонна бүгүҥҥү кэми бэлиэтээбит суругун Туос тууйаска укта. Тэрээһиҥҥэ «Нам улууһа» МО баһылыгын солбуйааччыта Юрий Вячеславович Дьяконов, ветеран Сэбиэтин председателя Софья Дмитриевна Кобякова тыл эттилэр.
Улуус 19 нэһилиэгин кэрийэн кэлбит инники көлүөнэҕэ анааммыт суруктардаах Туос тууйаһы уонна акция айанын туһунан тута бэлиэтээһиннэрдээх, хаартыскалардаах өйдөбүнньүк-альбому Юрий Вячеславович П.И. Сивцев аатынан Намнааҕы история уонна этнография музейын директорыгар Александр Иванович Копыриҥҥа үөрүүлээх быһыыга-майгыга ытыс дохсун тыаһыгар 2045 сылга диэри хараллыыга туттарда. Акция уопсайа 1360 киһини хапта. Ол иһигэр 937 оҕо кытынна. Туруоруллубут сорук 100 % толорулунна.
Саллаат туос тууйаһын Дойду уонна Саха сирин норуотун маастара Татьяна Алексеевна Карамзина салайааччылаах Нам улууһун “Намыына” уран тарбахтаах туосчуттарын түмсүүтэ тигэн бэлэхтээбитэ. Алтыына Юлиевна Шапошникова айан устатын тухары бэлиэтээһиннэри суруйда.
Улуу Кыайыы 80 сылыгар анаммыт Акция П.П. Ядрихинскай-Бэдьээлэ аатынан Олоҥхо дьиэтин специалиһа Владимир Владимирович Сыромятников оһуохайынан түмүктэннэ.
Ким да умнуллубат!
Туох да умнуллубат!
