Айан муус устар ый иккис күнэ Салбаҥ нэһилиэгиттэн саҕаланна. Г.И. Кривошпакин аатынан «Эйгэ» сынньылаҥ киинигэр нэһилиэк кырачааннарыттан саҕалаан ытык кырдьаҕастарыгар диэри толору мустубуттар.
Кырачаан олохтоохтор Саха саллааттарыгар анаммыт фронтовик-суруйааччылар айымньыларыттан ааҕан иһитиннэрдилэр. Эдэр ыччат бу тэрээһиҥҥэ ылсан салайан иилээн ыыппытара биһирэттэ.
П.И. Сивцев аатынан Намнааҕы история уонна этнография музейын специалиһа Анастасия Заболоцкая «Музей в чемодане» экспонаттарын, Нам сириттэн, Салбаҥтан Аҕа дойду сэриитигэр кыргыһыыга барбыт, кыттыбыт буойуттар, ытык ветераннар тустарынан кэпсээтэ.
А.Ф. Шестаков аатынан улуустааҕы норуот айымньытын дьиэтин «Коробейники» нуучча ырыатын народнай ансаамбылын салайааччыта Дмитрий Барабанов, кини уһуйааччыта Святослав Барабанов Аҕа дойду сэриитигэр Улуу Кыайыыны уруйдуур ырыаларын бэлэхтээтилэр.
Бу күн Таастаах нэһилиэгэр айан дьоно «Чэчир» сынньалаҥ киинигэр тиийдилэр. М.В. Петрова аатынан Таастаах орто оскуолатын үөрэнээччилэрэ литературнай композицияларын көрдөрдүлэр.
Саллаат туос тууйаһыгар Таастаах нэһилиэгэ» тыа сирин түөлбэтин МТ баһылыгын солбуйааччыта Любовь Гаврильевна Атласова туттарда. Үөрүүлээх көрсүһүүгэ «Хайыһар» ырыата дуорайда.
Күммүт үһүс нэһилиэгэ — Искра. «Алаас» сынньалаҥ киинигэр «Искра нэһилиэгэ» тыа сирин түөлбэтин МТ баһылыга Андрей Григорьевич Новгородов дьонун-сэргэтин кытта эҕэрдэлии көрүстэ.
Бу курдук ыраах-ыраах ардылаах үс нэһилиэгинэн Акциябыт ааста, олохтоохторго сонун сэргэх тэрээһини бэлэхтээтибит, эрэллэрэ буолар кэскиллэрин — детсад, оскуола оҕолорун ырыаларын, хоһооннорун, үҥкүүлэрин көрдүбүт-иһиттибит, туос тууйаспытыгар үс муннуктуу сууламмыт суруктары туттубут.
Бүгүҥҥү айаҥҥа И. С. Гаврильев аат. Нам 1 № оскуолатын 8 кылааһын үөрэнээччитэ Святослав Барабанов барсан, Салбаҥҥа летчик, Таастаахха моряк, Искраҕа казак таҥастарын кэтэн Аҕа дойду сэриитигэр саллааттар хайдах таҥастаах-саптаах сылдьыбыттарын көрдөрдө. Бу олус биһирэмнээх. Эбиитин бэйэтэ гармошкатын тыаһатан ыллаан, хоһоонноон иһитиннэрдэ, оҕо да, улахан да дьону сүрэхтэрин сүүйдэ. Бэлиэтээн эттэххэ — Святослав байыаннай таҥас-сап коллекционердарыттан биирдэстэрэ. Онон, аныгыс сырыыга ханнык форманан кыттарын таайа күүтэбит.
