Муус устар 2 күнүгэр «Нам улууһа Кыайыы суолунан» акция айана Салбаҥ, Таастаах, Искра нэһилиэктэригэр сырытта.

Олохтоохтор Дмитрий Барабанов толоруутун уонна кини салайар «Коробейники» нуучча ырыатын народнай ансаамбылын кыттааччыта Святослав Барабанов гармошкалаах ырыатын, хоһоонун астын-дуоһуйа, сөҕө-махтайа иһиттилэр. Святослав байыаннай таҥас-сап коллекционардарыттан биирдэстэрэ. Салбаҥҥа летчик, Таастаахха моряк, Искраҕа казак таҥастарынан кытынна. 

Аҕа дойду сэриитигэр ыҥырыллан барбыт биир дойдулаахтарбыт, Улуу Кыайыыны уһансыбыт ытык ветеранарбыт тустарынан, Ржев куораты босхолооһуҥҥа кыттыбыт буойуттары кэриэстээн Ржев куораты кытта Нам сирэ ыкса үлэлэһиилэриттэн  П.И. Сивцев аатынан Намнааҕы история уонна этнография музейын Киновидеоархив үлэһитэ Анастасия Заболоцкая, Нам 2№ орто оскуолатын учуутала Ирина Григорьева кэпсээтилэр, сэрии сэбиргэлин, саллааттар туттубут малларын уонна «Кыайыы символлара», «Ржев куорат уонна Нам улууһа» документальнай киинэни көрдөрдүлэр.  

«Движение Первых» Намнааҕы отделениетын специалиһа Айсен Парников олохтоохторго ыыппыт   музыкальнай лотуота киэҥ сэҥээриини ылла. 

Бу курдук ыраах-ыраах ардылаах үс нэһилиэгинэн Акциябыт ааста,  олохтоохторго сонун сэргэх тэрээһини бэлэхтээтибит, эрэллэрэ буолар кэскиллэрин — детсад, оскуола оҕолорун ырыаларын, хоһооннорун, үҥкүүлэрин көрдүбүт-иһиттибит, туос тууйаспытыгар үс муннуктуу сууламмыт суруктары туттубут.