Аҕа дойду сэриитигэр Улуу Кыайыы 80 сылынан, «Нам улууһа» муниципальнай оройуон баһылыга Юрий Иннокентьевич Слепцов кулун тутар 10 күнүгэр 612№ Дьаһалыгар олоҕуран, төрөөбүт ийэ дойдуга тапталы, бэриниилээх буолууну көҕүлүүр, Улуу Кыайыыны аҕалбыт өбүгэлэрбитин, оччотооҕу уордаах сэрии кэмигэр бүгүҥҥү дьоллоох олоҕу уһансыбыт ытык ветераннарбытын санаан-ахтан, кэриэстээн, кинилэр сырдык ааттарын үйэтитиигэ ананар акция биллэриллибитэ.
Дириҥ суолталаах тэрээһин Кулун тутар 18 күнүгэр Арбын нэһилиэгиттэн саҕаланна. «Нам улууһа» муниципальнай оройуон баһылыгын солбуйааччы Юрий Вячеславович Дьяконов салайааччылаах агитационнай-култуурнай бөлөҕү нэһилиэк баһылыга Игорь Леонидович Гоголев, «Тускул» сынньалаҥ киинин директора Оксана Николаевна Соловьева, уус-уран салайааччы, эдэр ыччат Владислав Игнатьевич Барамыгин үөрэ тоһуйан олохтоохторун, үөрэнээччилэрин мунньан көрүстүлэр.
«Нам улууһа Кыайыы суолунан» акция айанын көрсүһүүтүгэр Анастасия Валерьевна Алексеева салайааччылаах оҕо литературнай коллектива Кыайыы кынаттаах хоһооннорун ааҕан тэрээһиҥҥэ кытынна.
А. Ф. Шестаков аатынан Улуустааҕы норуот айымньытын дьиэтин «Коробейники» нуучча ырыатын народнай ансаамбылын салайааччыта Дмитрий Николаевич Барабанов толорбут ырыаларын олохтоохтор наһаа сөбүлээтилэр.
Оройуонунааҕы Үөрэх салалтатын специалиһа Юлия Петровна Жергина, «Движение Первых» Россия оҕо уонна ыччат хамсааһынын Намнааҕы отделениетын специалиһа Анна Ильинична Ядрихинская ыыппыт Музыкальнай лотоларын сүрдээҕин сэргээтилэр.
П. И. Сивцев аатынан история уонна этнография музейын выставочнай отделын сэбиэдиссэйэ Рустам Леонидович Федоров «Музей в чемодане» экспонаттарын көрдөрө-көрдөрө кэпсээбитин ордук оҕолор сэҥээрдилэр. Тэрээһин бүтүүтэ уол аймах тутан-хабан, ыйытыыларыгар хоруй ылан өссө ордук астыннылар. Намнааҕы киновидеоархив бэлэмнээбит Нам оройуонун дьоно Аҕа дойду сэриитин кэминээҕитин кэпсиир документальнай киинэни көрөн саала иһэ уу-чуумпу буолан ылла.
Олохтоох библиотека Аҕа дойду сэриитигэр биир дойдулаахтарбыт тустарынан суруллубут үйэлээх кинигэлэринэн выставката ааспыт үйэ кэмин эргитэ, уот сэрии, сут-кураан дьыллары санатан «кэпсии» турда.
Илья Чаҕылҕан «Хаһыйар» ырыатын бары сүһүөхпүтүгэр туран ыллаатыбыт. Владислав Барамыгин олус наҕыл оһуохайын хаамтаран Улуу Кыайыыны уруйдаатыбыт, Арбын нэһилиэгин кэскилин айхаллаатыбыт.
Бу курдук, итии үүттээх чэй иһэн, Оксана Николаевна, Игорь Леонидович буолан сэһэргэһэ түһэн баран Хатырык суолун тутустубут
Саха дьолугар төрөөбүт биллиилээх политическай уонна судаарыстыбаннай деятель Максим Кирович Аммосов төрөөбүт Хатырык нэһилиэгин саҥа таас тутуу Дыбарыаһыгар олохтоохтор эҕэрдэлии көрүстүлэр. Дьону-сэргэни Кыайыыга көҕүлүүр тэрээһини оройуон айар куттаах кэрэ эйгэтин киэн туттар үлэһиттэриттэн биирдэстэрэ, «Сайдам» норуот айымньытын дьиэтин директора Елена Владимировна Ефремова иилээн-салайан ыытта. М. К. Аммосов аатын сүгэр Хатырык орто оскуолатын үөрэнээччилэрэ тэрээһиҥҥэ байыас форматын кэтэн кэлбиттэрэ кэрэхсэттэ. Ону сэргэ, кэлбит ытык ветераннар эмиэ анаан-минээн оҥостон кэлбиттэрэ үөртэ.
Талаан чочуллар алаһатыгар Улуу Кыайыы 80 сылын уруйдуур-айхаллыыр улахан баннер тардыллыбыт. Оччотооҕу кэми сэһэргиир кинигэ выставката туруоруллубут. Олохтоохтор Дмитрий Барабанов толоруутугар ырыа бэлэхтэргэ дохсун ытыс тыаһынан махтаннылар, оҕолуун-улаханныын музыкальнай лотоҕа көхтөөхтүк оонньоотулар. Документальнай киинэни көрөн Аҕа дойду сэриитин туһунан чахчылары көрдүлэр-иһиттилэр. «Библиотека в чемодане» уонна «Музей в чемодане» көрөөччүлэр ортолоругар киэҥ биһирэбили ыллылар. Ол курдук, М.А. Охлопкова аатынан Хатырык модельнай библиотекатын библиотекаря Ульяна Николаевна Андросова уонна П.И. Сивцев аатынан Намнааҕы история уонна этнография музейын выставочнай отделын сэбиэдиссэйэ Рустам Леонидович Федоров ааспыт олохпут чахчылаах туоһулара буолар чемоданнарга баар экспонаттартан, кинигэлэртэн кэпсээтилэр.
Тэрээһин соруктарыттан биирдэстэрэ — Аҕа дойду сэриитигэр Улуу Кыайыы 80 сылынан «Кэм тууйаһа» анал бэлиэни кэритии буолар. Туос тууйаска хас биирдии нэһилиэк үс муннуктуу сууламмыт инники көлүөнэҕэ анаабыт кэс тыллардаах суруктарын угаллар. Бу барыта, ыам ыйын 6 күнүгэр, П. И. Сивцев аатынан история уонна этнография музейыгар хараллыыга туттарыллыаҕа. «Хатырык нэһилиэгэ» муниципальнай тэриллии баһылыгын солбуйааччы Айаал Александрович Дьяконов айан кыттыылаахтарыгар нэһилиэк олохтоохторун ааттарыттан суругу туттарда.
«Хайыһар» ырыаны саалаҕа туран дорҕоонноох толоруу кэннэ Өрөспүүбүлүкэ дархан этээччитэ Сыдьаайа-Лоҥхо дьоһун сылы бэлиэтиир оһуохайа бүгүҥҥү «Нам улууһа Кыайыы суолунан» акция айанын үөрүүлээх көрсүһүүтүн түмүктээтэ.
