А.Ф. Шестаков аатынан улуустааҕы норуот айымньытын дьиэтин «Коробейники» нуучча ырыатын народнай ансаамбылын салайааччыта Дмитрий Николаевич Барабанов уонна кини ырыаҕа уһуйар оҕото Амелия Софронова «Нам улууһа Кыайыы суолунан» акция айаныгар  кулун тутар 21 күнүгэр Көбөкөн, Фрунзе, Маймаҕа нэһилиэктэригэр сырыттылар. 
Ол курдук, Көбөкөн нэһилиэгин Прокопий Ядрихинскай-Бэдьээлэ аатынан Сынньалаҥ киинигэр Көбөкөн орто оскуолатыттан ( салайааччы Агафья Николаевна Петрова) Кыайыы туһунан ырыанан көрүстүлэр. 

Нам 2№ орто оскуолатын 5 кылааһын үөрэнээччитэ Амелия Софронова уонна кини ырыаҕа уһуйааччыта Дмитрий Барабанов ырыаларыгар дохсун ытыс тыаһа хабылынна. Манна бэлиэтээн эттэххэ — кырачаан кыттааччы Амелия ырыаҕа бастакы холонуута уонна сценаҕа бастакы тахсыыта. Амелия композитор Ольга Юдахина музыкатыгар, поэт Илья Резник тылларыгар «Дети войны» ырыаны толордо.

Акция айанын көрсүһүүтүгэр көрөөччүлэр ортолоругар оҕо саадын иитиллээччилэрэ иитээччилэрин кытта кэлэн көрбүттэрэ-истибиттэрэ биһирэттэ. Ону сэргэ, оскуола учууталлара үөрэнээччилэрин кытта музыкальнай лотуоҕа оонньоотулар, билиилэрин тургутуннулар. Сэрии сэбиргэлэрин туһунан Рустам Федоров кэпсиирин иһиттилэр, документальнай киинэни көрдүлэр. Прокопий Ядрихинскай-Бэдьээлэ аатынан Сынньалаҥ киин директора Илларион Илларионович Пестерев «Туой тууйаска» анаан нэһилиэк олохтоохторун, тэрээһин кыттааччыларын ааттарыттан алгыстаах үс муннуктуу суругу туттарда. 

Салгыы, Фрунзе нэһилиэгин олохтоохторо Егор Охлопков Буоратай аатынан Сынньалаҥ киин дьиэтигэр үөрэ көрстүлэр. Фрунзе оскуола-саадын (салайааччы Анна Данилова) иитиллээччилэрэ уонна үөрэнээччилэрэ өрөгөйдөөх ырыаларын бэлэхтээтилэр. 

Рустам Федоров «Музей в чемодане» экспонаттары кэпсээтэ, «Движение Первых» Намнааҕы отделение специалиһа Айсен Парников музыкальнай лотону ыытта. 

Амелия Софронова, Дмитрий Барабанов ырыаларынан киэргэттилэр. Ырыалар толорууларын тухары экраҥҥа Аҕа дойду сэриитигэр култуура үлэһиттэрин  Кыайыыга анаабыт үлэлэрин-хамсааһыннарын, киллэрсибит кылааттарын туһунан кэпсиир хаартысканан слайда көрдөрүлүннэ 

Нам улууһа Аҕа дойду сэриитин кэминээҕитин, буойуттарын, ветераннарын, бэлиэлэрин туһунан документальнай киинэ көрдөрүлүннэ.  Олохтоохтор  «Хайыһар» ырыатын сүһүөхтэригэр туран толордулар.  

Фрунзе нэһилиэгин ветераннарын сэбиэтин председателя Анна Егоровна Охлопкова нэһилиэк историятыттан, Аҕа дойду сэриитин кэмин уонна буойуттар, ветераннар тустарынан сырдатта уонна П.И.Сивцев аатынан Намнааҕы история уонна этнография музейыгар анаан Аҕа дойду сэриитигэр Фрунзе нэһилиэгин дьонун туһунан кэпсиир матырыйааллары үөрүүлээх быһыыга-майгыга туттарда. Ол кэннэ, нэһилиэк олохтоохторун ааттарыттан «Туос тууйаска» анабыл суругу укта.  

Акция кыттыылаахтара аны Маймаҕа нэһилиэгин «Кыталык» сынньалаҥ киинигэр сырыттылар. Нэһилилиэк кэскиллэрэ ырыалаах-хоһоонноох көрүстүлэр. Ону сэргэ, «Музей в чемодане» экспонаттары, музыкальнай лотону, документальнай киинэни сэҥээрдилэр. 

Олохтоох ветераннар сэбиэттэрин председателя Сардаана Михайловна Андросова нэһилиэк аатыттан анабыл суругу «Туос тууйаска» туттарда. 

Бу курдук, айан кыттыылаахтарыгар — кырачаан ырыаһыт Амелия Софроноваҕа уонна кини уһуйааччытыгар Дмитрий Барабановка, Рустам Федоровка, Айсен Парниковка Көбөкөн, Фрунзе, Маймаҕа нэһилиэктэрин олохтоохторо ытыс дохсун тыаһынан махтаннылар.  «Кыратыттан кырдьаҕаһыгар диэри кэлэн, элбэҕи биллибит, олус сэргэхсийдибит» диэн үөрүүлэрин үллэһиннилэр. 

Айан кыттааччылара Нам улууһун дьаһалтатын СМИ үлэһитигэр Лариса Тимофееваҕа уонна суоппарга Сергей Орловка махтаналлар.