Олунньу 20 күнүгэр М.К. Аммосов аатынан култуура уонна духуобунай сайдыы Дыбарыаһыгар «Дьиэ кэргэн — ийэ тыл биһигэ» III Өрөспүүбүлүкэтээҕи төрөппүт сугулаана үгүс дьону түмтэ.
Бу бырайыак СӨ Үөрэҕин уонна билимин министерствотын, өрөспүүбүлүкэтээҕи «Ийэ тыл кэскилэ» өрөспүүбүлүкэтээҕи хамсааһынын общественнай тэрилтэтин өйөбүллэринэн, Нам улууһун дьаһалтатын, Нам улууһун Үөрэх салалтатын тэрийиитинэн ыытылынна.
Хас биирдии кэлбит ыалдьыты киириигэ «Нам Кылыһах» уонна «Дорҕоон» төрүт дорҕоон бөлөхтөрө саха тыаһынан-ууһунан, Никольскай нэһилиэгин дьахталларын Сэбиэтэ дэйбиирдээх арчылаан уруйдаан-айхаллаан көрүстүлэр.
Саха үгэһинэн ыраахтан-чугастан кэлбит Сугулаан кыттааччылара мустан алгыс сиэрин-туомун аастылар. Алгыһы П.П. Ядрихинскай-Бэдьээлэ аатынан Олоҥхо Дьиэтин үлэһитэ Владимир Сыромятников-Дьиэрэй толордо.
А.Ф. Шестаков аатынан Улуустааҕы норуот айымньытын Дьиэтин үлэһитэ, Өрөспүбүлүкэтээҕи «Олоҥхо-Баттл» проект кыттыылааҕа Вера Цыпандина бэйэтэ салайан илдьэ сылдьар «Дьэргэлгэн» оҕо фольклорнай бөлөҕүн кытта биллиилээх олоҥхоһут Егор Охлопков-Буоратай «Алантай Боотур» олоҥхотуттан быһа тардан аныгылыы туруоруунан көрдөрдө-иһитиннэрдэ.
Сугулаан үөрүүлээх быһыыга-майгыга арыллытыгар «Нам улууһа» МТ баһылыгын солбуйааччы Егор Андреевич Протопопов, СӨ Үөрэх уонна Билим Министерствотын проектары салайар координационнай штаб салайааччыта Алевтина Петровна Аргунова, Арассыыйа наукатын академиятын Сибиирдээҕи салаатын гумантиарнай чинчийии уонна хотугу аҕыйах ахсааннаах омук институтун социолингвистикалыы чинчийии билимин киинин үлэһитэ, «Ийэ тыл кэскилэ» өрөспүүбүлүкэтээҕи хамсааһынын салайааччыта Вилюяна Николаевна Никитина, «Сахатранснефтегаз» тэрилтэ гаас сүрүн ситимин көрөр салалтатын кылаабынай инженера, СӨ термин уонна тылбаас хамыыһыйатын чилиэнэ, Саха итэҕэлин Сүбэтин түмээччитэ Павел Валерьевич Ксенофонтов-Ойуур Байбал тыл эттилэр. Нам улууһун култуураҕа уонна духуобунай сайдыыга салалта начальнигын солбуйааччы Александра Николаевна Новгородова тэрээһин бары кыттааччыларын эҕэрдэлээтэ уонна норуот уус-уран оҥоһугун, култуурнай нэһилиэстибэтин харыстыырга, сайыннарыыга хорутуулаах үлэтин иһин «Нам улууһун Норуотун маастара» үрдүк бэлиэни РСФСР үөрэҕириитин туйгунугар, педагогическай үлэ бочуоттаах бэтэрээнигэр Наталья Ивановна Белолюбскаяҕа туттарда.
Олохтоох ааптар, мелодист, СӨ култууратын туйгуна, А.Ф. Шестаков аатынан Улуустааҕы норуот айымньытын Дьиэтин үлэһитэ Афанасий Татаринов «Биир сомоҕо» күүстээх тирэхтээх ырыатын бэлэхтээтэ.
III өрөспүүбүлүкэтээҕи сугулаан иккис чааһыгар Нам улууһун иитэр-үөрэтэр тэрилтэлэрин оҕону сахалыы иитиигэ, көрүүг-истиигэ туһуламмыт араас ньымаларын көрдөрөр, билиһиннэрэр киэҥ далааһыннаах дьаарбаҥката ыалдьыттары уонна Нам улууһун олохтоохторун сэҥээриитин ылла. «Үтүө холобуру көрүү» түһүмэххэ араас улуустартан кэлбит төрөппүт кэмитиэттэрэ, култуура үлэһиттэрэ оҕо сахалыы саҥатын сайыннарыыга, оҕону сахалыы иитиигэ сонун уонна кэрэхсэбиллээх ньымаларын сырдаттылар. Ону сэргэ, «Уол оҕо — омук төрдө, кыыс оҕо — омук кэскилэ», улуус кииннэммит оҕо бибилотекатыгар «Саха тылын саргыта — ыччат санаата», «Оонньуубут, сайдабыт, сахалыы саҥарабыт» диэн дириҥ ис хоһоонноох үс түһүлгэ үлэлээтэ.
Бу курдук, «Дьиэ кэргэн — ийэ тыл биһигэ» III Өрөспүүбүлүкэтээҕи төрөппүт сугулаана Нам улууһугар киэҥ хабааннаахтык үгүс кыттааччыны, олохтоохтору түмэн, үрдүк таһымҥа ыытылынна.
Нам улууһун Үөрэх салаатын начальнига Мария Семеновна Игнатьева А.Ф. Шестаков аатынан Улуустааҕы норуот айымньытын дьиэтин коллективыгар, тэрээһин бары кыттааччыларыгар махталын биллэрдэ.
