Олунньу 19 күнүгэр Аҕа дойду сэриитин кыттыылааҕа, РСФСР уонна Саха АССР Культуратын Үтүөлээх үлэһитэ, ССРС Культуратын туйгуна, «Бочуот Знага» орден кавалера, Нам улууһун Бочуоттаах гражданина, самодеятельнай композитор «Ньургуһун» Народнай үҥкүү-хор коллектива тэриллиитигэр сүрүн олугу уурбут Афанасий Федорович Шестаков төрөөбүтэ 100 сылын бэлиэтээтибит.
Дэгиттэр талааннаах биир дойдулаахпыт, ураты күүстээх санаалаах, дьулуурдаах Афанасий Шестаков урусхаллаах, үгүс сүтэриилээх Аҕа дойду сэриитин кэнниттэн Нам улууһугар, Саха сиригэр сирдээҕи олох саҥаттан саҕылларыгар дириҥ кылаатын киллэрсибит сүдү киһибит буолар.
Тэрээһиҥҥэ Афанасий Шестаков оҕолоро, сиэннэрэ, аймах-уруу дьоно, эдэр сааһыттан алтыспыт биир идэлээхтэрэ, чугас доҕотторо уонна кини аатын сүгэр Улуустааҕы норуот айымньытын Дьиэтин үлэһиттэрэ кыттыыны ыллылар.
Култуура уонна искусства эйгэтигэр халыҥ дьапталы уурбут Афанасий Шестаков бюһугар сырдык кэриэһигэр сүгүрүйэн, кэриэстээн тыыннаах сибэкки уурулунна.
П.И.Сивцев аатынан Намнааҕы история уонна этнография музейыгар Афанасий Шестаков олоҕун, айар үлэтин кэрэһэлиир быыстапка арылынна. Музей директора Александр Копырин Афанасий Федорович Шестаков музейга үлэлээбит кэмнэриттэн кэпээтэ.
Ахтан-санаан ааһар көрсүһүүгэ «Нам кылыһах» төрүт дорҕоон бөлөҕө (сал. Мария Григорьева-Маайа), Намнааҕы көр-күлүү театра (сал. Иван Новиков), «Ньургуһун» народнай үҥкүү коллективын солистара (сал. Мария Попова) толорууларыгар Афанасий Шестаков суруйан хаалларбыт дэгэрэҥ ырыата, кини туруорбут көрдөөх сценката уонна бииргэ үлэлээбит Роза Кириллова туруоруутугар «Матросскайдыы үҥкүү» толорулунна.
Аҕа дойду сэриитин кэнниттэн Намҥа култуура эйгэтин сайдыытыгар бастакы хардыылар, бастакы сардаҥалар кэмнэриттэн П.И. Сивцев аатынан Намнааҕы история уонна этнография музейын Киновидеоархив отдела анаан бэлэмнээбит Афанасий Федоровичка кынат кэриэтэ буолан айымньылаахтык үлэлээбит, «Ньургуһун» народнай үҥкүү-хор коллективын төрүттэспит балетмейстер Роза Борисовна Кириллова, аккомпаниатор Илья Львович Христофоров тустарынан документальнай киинэ бу бэлиэ күҥҥэ сүрэхтэннэ.
Култуура уонна искусства эйгэтин ырыа, үҥкүү, театр, төрүт үгэс, уруһуй, иис-уус көрүҥнэрин толору баһылаабыт, эргиччи талаанынан сандаарар ытык киһибит сырдык аата үлэлээн ааспыт, олоҕун бүтүннүү анаабыт Нам киинин оройуоннааҕы култуура дьиэтигэр 2000 сыллаахха иҥэриллибитэ.
Тэрээһиҥҥэ «Нам улууһа» МТ баһылыгын солбуйааччы Юрий Дьяконов, Нам улууһун Култуураҕа уонна духуобунай сайдыыга салалтатын начальнига Семен Ядрихинскай тыл эттилэр. Юрий Вячеславович А.Ф. Шестаков аатынан Улуустааҕы норуот айымньытын дьиэтигэр юбилейдаах сылга Афанасий Федорович аатын үйэтитиигэ анаан 50 тыһыынчалаах сертификат туттарда.
Афанасий Федорович Шестаков төрөөбүтэ 100 сылыгар аналлаах ахтыы киэһэтэ кини суруйан хаалларбыт «Доҕорбор» ырыатын А.Ф. Шестаков аатынан Улуустааҕы норуот айымньытын Дьиэтин үлэһиттэрэ Анна Яковлева, Афанасий Татаринов баян доҕуһуоллаах толорууларынан түмүктэннэ.
Салгыы, юбилейдаах сылга анаммыт хас да хайысхалаах тэрээһиннэр бу сыл сэтинньи ыйа түмүктэниэн диэри былаан быһыытынан ыытыллыахтара.
