Бүгүн, олунньу ый 17 күнүгэр, Аҕа дойду сэриитин кыттыылааҕа, РСФСР уонна Саха АССР култууратын Үтүөлээх үлэһитэ, ССРС култууратын туйгуна, «Бочуот бэлиэтэ» Орден кавалера, Нам улууһун Ытык киһитэ, самодеятельнай композитор, Саха сиригэр айар-тэрийэр култуура эйгэтигэр бастакынан «Народнай» аат иҥэриллибит «Ньургуһун» үҥкүү-хор коллективын төрүттээччи Афанасий Федорович Шестаков төрөөбүтэ 100 сыла.
Бэлиэ күн «Саха» НКИХ сарсыардааҥы «Саҥа күн» быһа биэриититтэн саҕаланна.
Афанасий Федорович Шестаков суруйбут «Доҕорбор» диэн күн бүгүнүгэр диэри уостан түспэт, сүрэхтэн сүппэр ырыатын А.Ф.Шестаков аатынан Улуустааҕы норуот айымньытын Дьиэтин үлэһиттэрэ Анна Яковлева, Афанасий Татаринов толордулар.
Афанасий Федорович Шестаковтуун ыкса үлэлээбит биир идэлээҕэ, ССРС культуратын туйгуна, СӨ профтех үөрэхтээһиҥҥэ туйгуна, СӨ норуотун хаһаайыстыбатын Үтүөлээх үлэһитэ, «За заслуги перед Отечеством» Уордьан II-с истиэпэннээх кавалера, «Гражданскай килбиэн» бэлиэ хаһаайына Нам улууһун Ытык Киһитэ Мария Николаевна ГАБЫШЕВА ис дууһатыттан сандаархай майгылаах, кэрэҕэ тардыһар, дьону-сэргэни түмэ тардар ураты талааннаах, эргиччи дьоҕурдаах Афанасий Федорович Шестаков туһунан кэпсээтэ. Мария Николаевна Афанасий Федоровичтыын ыкса үлэлээбит буолан, биир идэлээҕин Сэдэх киһи этэ диэн ахтар. Чахчы даҕаны, биир киһини айылҕа үгүһү анаан туран маанылаабыт диэххэ сөп: сатабыллаах салайааччы, ырыаһыт уонна ырыа айааччы, үҥкүүһүт уонна үҥкүү туруорааччы, уруһуйдьут, уус уонна иистэнньэҥ, оччотооҕу урусхаллаах Аҕа дойду сэриитигэр кыайыы кэннэ саҥа тутуллар олоҕу уһансыбыт, улууска, Саха сиригэр сүҥкэн кылаатын уурбут Ытык киһибит буолар.
Култуура уонна искусство Арктикатааҕы судаарыстыбаннай институтун библиотековедениеҕа уонна гуманитарнай дисциплинаҕа кафедратын доцена, педагогическай наука кандидата, Афанасий Федорович сиэнэ Инна Иннокентьевна САННИКОВА эһээтин туһунан олус үтүө өйдөбүллээҕин аҕынна. Эһээтэ тыыннааҕар сиэнигэр тапталын анаан, киэҥ билиигэ тардыһар ыччаты иитиспитин ахтар. Аҕа дойду сэриитин Улуу Кыайыытын Забайкальскай фронугар сылдьан көрсүбүтэ. Дойдутугар эргиллэн кэлэн, айар үлэ умсулҕаныгар олоҕун бүтүннүү анаабыта.
Афанасий Федорович Шестаков аатын сүгэн турар Нам улууһун норуот айымньытын Дьиэтин директора Константин Иванович КОЛОДЕЗНИКОВ үбүлүөйдээх сылга ыытыллар тэрээһиннэр тустарынан билиһиннэрдэ.
