Олунньу ый 4 күнүгэр, Дьокуускай куоракка «Күн оһуохайа» телевизионнай өрөспүүбүлүкэтээҕи оһуохай күрэҕэ саҕаланна. Манна Саха сирин араас улуустарыттан саха төрүт үҥкүүтүн — оһуохайы оройуттан тутар оҕолор муһуннулар. Намтан А.Ф. Шестаков аатынан Улуустааҕы норуот айымньытын Дьиэтин уран тыл маастарыстыбатыгар уһуйар, «Дьэргэлгэн» оҕо, «Ай-Тыл» ыччат фольклорнай бөлөхтөрүн, «Эҥсиэли оһуохайа» түмсүү салайааччыта Вера Цыпандина наставник быһыытынан кытта киирдэ.
«Күн оһуохайа» телевизионнай оҕо оһуохайын күрэҕэ Саха Өрөспүүбүлүкэтин култуура Үтүөлээх үлэһитин, СӨ култуура уонна үөрэҕэрии туйгунун, Саха Сирин Аан Дархан оһуохайдьытын, Үөһээ Бүлүү улууһун култуура уонна духуобунай сайдыы департаменын салайааччытын Айталина Мойтохонова-Сахаайта көҕүлээһининэн, СӨ Бырабыыталыстыбатын Бэрэсэдээтэлин солбуйааччытын Сергей Местников, СӨ култуура уонна духуобунай сайдыы миниистирин Афанасий Ноев, маны сэргэ СӨ үөрэҕэрии уонна наука министиэристибэтин өйөбүллэринэн үһүс төгүлүн ыытыллар.
Бырайыак салайааччыта — «Саха» НКИХ дириэктэрэ Олег Колесов.
Оҕолорго наставник быһыытынан кыттар биир идэлээхпит Вера Прокопьевна 10 күн устата оҕолору салайа сылдьыаҕа. Күн ахсын проект чэрчитинэн ыытыллар араас тэрээһиһи сырдатар:
«Бастакы күҥҥэ наставниктар «Саха» НКИХ музейыгар сырыттыбыт. Телевидение, радио үлэтин ис өттүн көрдүбүт. Арчы дьиэтигэр алгыстанан, ыраастанан баран «Күн Оһуохайа» бырайыак арыллыытын устуутун бэлэмнээтибит.
Хас биирдии наставник биэстии оҕону сэрэбиэйинэн үллэһиннибит. Ол курдук, наставниктар Үөһээ Бүлүүттэн Розанна Герасимова, Хаар Семенова, Таттаттан Лариса Попова, Чурапчыттан Нарыйаана Николаева уонна Намтан мин буолабыт».
Кыттааччылар 10 күн устата Саха сирин үтүөлээх оһуохайдьыттара уһуйааччылаах араас ньымаларга, тута хоһуйарга, түөлбэнэн оһуохай араастарыгар үөрэниэхтэрэ, «Бэс чагда» оҕо лааҕырыгар биэс түһүмэҕинэн күрэхтэһиэхтэрэ.
Олунньу 13 күнүгэр «Саха» НКИХ быһа эфирга киэһээ 19:00 чааска күрэх түмүктүүр түһүмэҕэ ыытыллыаҕа. Маны сэргэ, бу нэдиэлэ устата «Саха» НКИХ күн ахсын «Күн оһуохайа» бырайыак күннүгэр күрэх хаамыытын көрдөрүөхтэрэ.
Бастакы түһүмэххэ хас биирдии наставник 5 кыттааччытыттан биирэ туоруур. Вера Прокопьевна бөлөҕөр Үөһэ Бүлүү, Бүлүү Чурапчы,Таатта оҕолоро уһуйуллаллар. Олортон биир кыттааччы номнуо туораата.
Биир идэлээхпитигэр Вера Прокопьевнаҕа ситиһиилээх үлэни баҕарабыт!
