Оһуохайбыт үҥкүүтэ
Этэр тылбыт ырыата,
Сааһыламмыт санаата күүһүрэн,
Сомоҕо дорҕоон буолан
Кый ыраахха тиийдин,
Үгэһи үмүөрүттүн,
Үтүөнү үксэттин!
Олунньу 7 күнүгэр А.Ф. Шестаков аатынан Улуустааҕы норуот айымньытын Дьиэтин тэрийиитинэн «Уруйдан, Кыайыы оһуохайа!» ойутар оһуохайдьыттар, дьиэрэтэр эһиэкэйдьиттэр күрэхтэрэ ыытылынна. Тэрээһин сүрүн соругунан саха төрүт үҥкүүтүн сөргүтүү, үүнэр көлүөнэҕэ тарҕатыы, бастыҥнары холобур оҥостуу уонна саҥа ааттары таһаарыы буолар.
Бу туһунан А.Ф. Шестаков аатынан Улуустааҕы норуот айымньытын Дьиэтин фольклорга исписэлииһэ Мария Григорьева-Маайа кэпсиир:
Нам улууһугар Хатыҥ-Арыы нэһилиэгин олохтооҕо Татьяна Ивановна Евсеева көҕүлээһининэн «Эҥсиэли оһуохайа» түмсүү 2013 сылтан тэриллибитэ. 10-тан тахса сыл устата оһуохай түмсүү көдьүүстээхтик үлэлээн, үгүс оһуохайдьыттар үүннүлэр-сайыннылар, өрөспүүбүлүкэҕэ ыытыллар араас тэрээһиннэргэ кыттан дьон-сэргэ ытыктабылын, киэҥ сэҥээриитин ылаллар. Билигин «Эҥсиэли оһуохайа» түмсүү салайааччыта А.Ф. Шестаков аатынан Улуустааҕы норуот айымньытын Дьиэтин уран тыл маастарыгар исписэлииһэ, Саха Өрөспүүбүлүкэтин Үтүөлээх оһуохайдьыта Вера Прокопьевна Цыпандина буолар.
Ил Дархан Айсен Сергеевич Николаев Арассыыйа норуоттарын култуураларын үйэлээх баайын эбийиэгин — саха төрүт үҥкүүтүн «Оһуохайы» харыстыыр уонна тарҕатар соруктаах Ыйааҕар олоҕуран, «Ленскэй нэһилиэк» МТ баһылыга Петр Григорьевич Сокольников тохсунньу 18 күнүгэр 24 № дьаһалынан Ленскэй нэһилиэккэ «Оһуохай күнүн» бэлиэтииргэ дьаһал таһаарбыта. Бу дириҥ суолталаах дьаһалынан омук быһыытынан үйэлэри уҥуордаан кэлбит үтүө үгэспитин үйэтитэн, Ленскэй нэһилиэккэ оһуохай күнүн көрсө «Уруйдан, Кыайыы күнэ!» улуустааҕы күрэһэр оскуола саастаах оҕолору, улахан дьоҥҥо саҥа саҕалааччылары, идэтийбит оһуохайы этээччилэри түмтүбүт.
Оһуохай түһүлгэтигэр «Нам улууһа» МТ култуураҕа уонна духуобунай сайдыыга Салалтатын начальнига Семён Прокопьевич Ядрихинскай, «Ленскэй нэһилиэк» МТ баһылыгын солбуйааччыта Тимофей Егорович Охлопков өрөгөйдөөх-үөрүүлээх түгэнинэн эҕэрдэ тылы эттилэр.
Улуустааҕы «Уруйдан, Кыайыы оһуохайа!» Нам улууһугар Кыайыы, Ленскэй нэһилиэккэ Дойдуга бэриниилээх буолуу сылларынан, оһуохай 100 шедевырга киирбитинэн А.Ф.Шестаков аатынан Улуустааҕы норуот айымньытын Дьиэтин, П.П.Ядрихинскай-Бэдьээлэ аатынан Олоҥхо Дьиэтин уонна «Эҥсиэли оһуохайа» Нам улууһун общественнай түмсүү көҕүлээһиннэринэн ыытылынна. Ол курдук, Хомустаах 1-кы, Партизан, Хамаҕатта, Хомустаах 2-с, Ленскэй, Модут, Хатырык, Түбэ нэһилиэктэриттэн 13 оҕо, 11 улахан киһи оһуохай таһаардылар. Хас биирдии оһуохай таһаарааччы анаан-минээн кынатчыттарын илдьэ кэлбиттэрэ кэрэхсэбиллээх.
Дьүүллүүр сүбэҕэ үлэлээтилэр — «Эҥсиэли оһуохайа» түмсүү куратора, СӨ төрөөбүт тыл сайдыытыгар уонна үйэтитиитигэр кылаатын иһин» бэлиэ хаһаайына, СӨ Үтүөлээх оһуохайдьыта, СӨ Дархан этээччитэ, Саха сирин Дарханнарын Сэбиэтин бэрэссэдээтэлэ Валентин Васильевич Хорунов, СӨ Үтүөлээх кынатчыта, Искра нэһилиэгин Бочуоттаах олохтооҕо, «Нам улууһугар оһуохай сайдыытыгар үтүөлэрин иһин» бэлиэ хаһаайката Мария Михайловна Бястинова, СӨ Оһуохайга чулуу кынатчыта, «Нам улууһугар оһуохай сайдыытыгар үтүөлэрин иһин» бэлиэ хаһаайката Нина Иннокентьевна Хордогосова.
Түмүккэ, оҕолорго
1 Үрдэл — Лена Саввинова, сал. Саргылана Протопопова (Партизан);
2 Үрдэл — Анджелика Федорова, сал. Туйаара Соловьева (Түбэ);
3 Үрдэл — Вика Захарова, сал. Саргылана Попова (2-Хомустах).
Улахан дьоҥҥо: саҥа саҕалааччылар ортолоругар
1 Үрдэл — Ирина Николаева (1-Хомустаах);
2 Үрдэл — Руслан Захаров (Хамаҕатта);
3 Үрдэл — Саргылана Попова (2-Хомустаах).
Идэтийбит этээччилэргэ:
1 Үрдэл — Елена Маркова (Нам);
2 Үрдэл — Владимир Осипов (Нам).
Дьүүллүүр сүбэ быһаарыытынан «Кэскиллээх этээччи» анал аат Хатырык нэһилиэгиттэн Любовь Левинаҕа үөрүүлээх быһыыга-майгыга туттарылынна.
Бары кыттааччыларга, оһуохайга бэлэмнээбит салайааччыларга, кынат буолбут дьоммутугар, дьүүллүүр сүбэҕэ уонна кыайыылаахтарга бириис олохтообут спонсордарбытыгар — «Эҥсиэли оһуохайа» түмсүүгэ, Нам улууһун Үөрэҕин салалтатыгар, А.Ф. Шестаков аатынан Улуустааҕы норуот айымньытын Дьиэтигэр уонна П.П. Ядрихинскэй-Бэдьээлэ аатынан Олоҥхо Дьиэтигэр Барҕа махталбытын тиэрдэбит. Өрүү маннык көхтөөх буолуҥ, оһуохайбытын сайыннарыаҕыҥ, кэнчээри ыччакка тарҕатыаҕыҥ!
