Тохсунньу 29 күнүгэр Арассыыйаҕа Аҕа дойдуну, Саха сиригэр Ийэ дойдуну көмүскээччилэрин, Нам сиригэр Кыайыы сылларын үөрүүлээх быһыыга-майгыга арыйар дириҥ суолталаах тэрээһин ыҥырыылаах ыалдьыта РФ прокуратууратын бэтэрээнэ, Юстиция полковнига, өрөспүүбүлүкэтээҕи сэрии уонна үлэ бэтэрээннэрин Сэбиэтин бэрэссэдээтэлин солбуйааччыта Никита Никитич Ноев Нам олохтооҕор, Саха Өрөспүүбүлүкэтин култууратын туйгунугар Иван Степанович Новиковка өрөспүүбүлүкэтээҕи сэрии уонна үлэ бэтэрээннэрин Сэбиэтин бэрэссэдээтэлэ Вильям Очирович Иванов илии баттааһыннаах «Почетный ветеран Республики Саха (Якутия)» дастабырыанньаны туттарда.
Биир идэлээхпитигэр, дэгиттэр талааннаах режиссербутугар Иван Степановичка А.Ф. Шестаков аатынан улуустааҕы норуот айымньытын Дьиэтин коллективын, Намнааҕы народнай театр бары кыттааччыларын ааттарыттан төлөннөөх эҕэрдэ! Дьиҥ олох суоруллубат историятын үүнэр көлүөнэҕэ театр эйгэтин нөҥүө тиэрдэр дьаныардаах үлэҕинэн биһиги киэн туттабыт! Өссө даҕаны саҥа арыйыыларыҥ, саҥа айымньыларыҥ көрөөччү, кыттааччы киэҥ биһирэбилин ыллыннар!
