Сэтинньи 27 күнүгэр Намнааҕы норуот тыйаатыра саха биллиилээх суруйааччыта, тылбаасчыт Илья Дорофеевич Винокуров-Чаҕылҕан суруйуутугар «Туллуктай» остуоруйаны туруоран көрөөччү киэҥ биһирэбилин ылла. «Туллуктай» остуоруйа-испэктээк Нам улууһугар аан бастаан туруорулунна. Манна кырачаан оҕолортон саҕалаан аҕа саастаах кыттааччыларга тиийэ Нам нэһилиэгин олохтоохторо оонньоотулар. Ол курдук, Намнааҕы норуот тыйаатырын артыыстара, И.С. Гаврильев аатынан Нам 1 № орто оскуолатын саха тылын уонна литературатын учуутала Лариса Данилова уонна режиссер Роман Герасимов салайар “Күндүл” литературнай-театральнай коллектива, «Ньургуһун» үҥкүү народнай коллективын кыра бөлөхтөрө, «Айылҕан» үҥкүү ансаамбыла кытыннылар. Мария Григорьева салайар «Нам кылыһах» төрүт дорҕоон бөлөҕүн доҕуһуола, Мария Григорьева суруйбут ырыата тыаһаата. Испэктээги уотунан Симонд Сивцев, экраҥҥа Николай Кривошапкин, декорациянан Николай Винокуров, Владислав Уваров, тыаһынан-ууһунан Владислав Грязнухин, Роберт Борисов киэргэттилэр.
Режиссердар — СӨ култууратын туйгуна Иван Новиков, Роман Герасимов. Ассистеннар — Туяра Абрамова уонна Култуура уонна искусства Арктикатааҕы институтун студентката Ньургустаана Лебедева. Үҥкүүлэри хореографтар Мария Попова, Павел Винокуров туруорудулар.
