«Саха» национальнай көрөдөрөр-иһитиннэрэр хампаанньа ханаалыгар үгэс быһыытынан ыытыллар эдэр олоҥхоһуттар күрэстэрэ «Олоҥхо-баттл» быйылгы үһүс сезона алтынньы ыйга буолан ааспыта. Күрэс сыллата өрөспүүбүлүкэ араас улуустарыттан кэскиллээх эдэр олоҥхоһуттары түмэн, талааннарын арыйан, көрөөччү киэҥ дьүүлүгэр таһаарар. Хас биирдии түһүмэххэ элбэх уустуктары ааһан бастыҥтан-бастыҥнар кыайыылаах аатын сүгэллэр.
Нам улууһуттан Олоҥхону идэтийэн толорооччу, «Дьэргэлгэн» оҕо фольклорнай ансаамбыл, «Ай-Тыл», «Норуот ырыалара» ыччат фольклорнай бөлөхтөрүн, «Эҥсиэли оһуохайа» түмсүү салайааччыта, «Өрөспүүбүлүкэ Үтүөлээх оһуохай этээччитэ» бэлиэ хаһаайына, өрөспүүбүлүкэҕэ ыытыллар Олоҥхо күрэхтэрин кыттыылааҕа, кыайыылааҕа, А.Ф. Шестаков аатынан Улуустааҕы норуот айымньытын дьиэтин үлэһитэ Вера Цыпандина кыттынна. Түөрт уустук түһүмэҕи ааһан, үһүс бочуоттаах миэстэҕэ тахсан «Кэскиллээх олоҥхоһут» диэн анал ааты сүгэн 50 тыһыынча солкуобайынан наҕараадаланна.
Эҕэрдэ буоллун талааннаах кыыспытыгар Вера Прокопьевнаҕа! Инниктин өссө саҥа арыйыылары, ситиһиилэри баҕарабыт!
