Балаҕан ыйын 5 күнүгэр Нам улууһун Таастаах нэһилиэгэр култуура уонна спорт киинин саҥа дьиэтэ аанын арыйда. Өр күүппүт түгэҥҥэ ыҥырыылаах ыалдьыттар уонна нэһилиэк олохтоохторо муһуннулар.
Ыҥырыылаах ыалдьыттар «Нам улууһа» МТ баһылыга Юрий Слепцов, Саха Өрөспүүбүлүкэтин Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Павлов, СӨ ФКуонС миниистирэ Леонид Спиридонов, «Сахам сирэ XXI үйэҕэ» өрөспүүбүлүкэтээҕи «Үтүө дьыала» хамсааһын салайааччыта Алексей Петров, «Алмазы России» Саха акционернай хампаанньа Миирнэйдээҕи-Ньурбатааҕы салаатын инженерэ Андрей Николаев, «Элпомгазстрой» ХЭТ директорын транспортка уонна оҥорон таһаарыыга солбуйааччыта Виктор Бурнашев, Нам улууһун КуоДС салаатын начальнига Семен Ядрихинскай, урбаанньыт Адрей Бочкарев эҕэрдэ тыл эттилэр. «Регион строй» ХЭТ директора Петр Матвеев «Таастаах нэһилиэгэ» МТ баһылыгар Сергей Аргуновка алгыстаах күлүүһү туттарда.
А.Ф. Шестаков аатынан Улуустааҕы норуот айымньытын Дьиэтин үлэһиттэрэ бу үөрүүнү үллэстэн, биир идэлээхтэригэр күүс-көмө, өйөбүл буоллулар. Тыас-уус, уот-күөс отделын сэбиэдиссэйэ Николай Кривошапкин салайааччылаах биригээдэ тиийэн саҥа дьиэлэммит биир идэлээхтэригэр техническэй үлэҕэ, кэлиэхтээх саҥа тэриллэргэ сүбэ-ама биэрдилэр, тэрээһини киэргэттилэр.
