Бэс ыйын 30 күнүгэр Калининградсай уобаласка «СахаФест Балтика — 2024» норуоттар икки ардыларынааҕы 1-кы норуот айар талааннаахтарын бэстибээлэ буолан ааста.
Бу бэстибээли Саха сириттэн «Якутское землячество» түмсүү бэрэссэдээтэл Владимир Окоёмов уонна Оксана Егорова, Калининградсай уобалас Пионерскай куорат «Светоч» култуура сынньалаҥ киинин директора Вячеслав Леонидов, Калининградскай уобалас «Пионерский уокурук» муниципальнай тэриллии баһылыга Леонид Шибаев уонна «Гудвил» ХЭТ директора Григорий Сабан иилээн-саҕалаан тэрийбиттэр.
Нам улууһуттан А.Ф. Шестаков аатынан Улуустааҕы норуот айымньытын Дьиэтин уран тыл маастарыстыбатыгар уһуйар специалист Вера Цыпандина салайааччылаах «Ай-тыл» фольклор бөлөҕө тиийэн тэрээһин арыллыытын сиэрин-туомун, алгыһын толордулар уонна араас норуоттар ортолоругар ыытыллыбыт айар талааны көрүү күрэххэ кытыннылар. Бөлөххө Нам улууһун култууратын идэлээх үлэһиттэрэрэ Үөдэйтэн Геннадий Игнатьев, Партизантан Мария Аргунова, Хатыҥ-Арыыттан Марианна Винокурова, Намтан Сахаайа Колодезникова дьарыктаналлар.
Нам улууһун чиэһин көмүскээн «Ай-тыл» бөлөх кыттыыны ылла уонна дьон-сэргэ кутун тутан, ураты кылыһахтаах норуот ырыатынан Гран -при үрдүк ааты сүктэ. Биирдиилээн кыттааччыларга Геннадий Игнатьев «Инстументал» куонкуруска I истиэпэннээх Лауреат, Сахаайа Колодезникова ырыа күрэҕэр I истиэпэннээх Лауреат буолла.
Айар куттаах биир идэлээхтэрбитин «Нам улууһа» МТ баһылыгын солбуйааччы Петр Сергучев салайан илдьэ сырытта.
Айар куттаах биир идэлээхтэрбитигэр, «Ай-Тыл» бөлөххө, салайааччы Вера Прокопьевна Цыпандинаҕа ситиһиилэринэн эҕэрдэ истиҥэ буоллун! Өссө да саҥа айымньылары, саҥа сүүрээннэри баҕарабыт!
Хаартыскалар Вера Цыпандина тус архыыбыттан ылылыннылар.
