Муус устар 19 күнүгэр Дьокуускай куоракка Нам улууһун култууратын уонна искусстватын эйгэтэ ыалдьыттаата. Ол курдук, Ю.А.Гагарин аатынан Култуура уонна аныгы искусство Киинигэр «Эҥсиэли уолаттара ыллыыллар» эҕэрдэ концерт буолла.
«Эҥсиэли уолаттара ыллыыллар» ырыа-бэлэх киэһэтин Нам туонатыгар буолаары турар Саха сирин үөрэнээччилэрин II-с Спартакиадатын бэлиэ кыыла Бэдэр кыттыылаах Нам улууһун ыччата үҥкүүнэн арыйда.
Нам улууһун Өрөгөй ырыатын саалаҕа баар бары көрөөччүлэр сүһүөхтэригэр туран ыллаатылар. «Нам улууһа» МТ баһылыгын солбуйааччыта Анатолий Павлов, «Нам улууһа» МТ депутаттарын Сэбиэтин председателя Алексей Винокуров эҕэрдэлээх тылларынан саҕалаатылар.
Саха сирин үөрэнээччилэрин II-с Спартакиадата буолара 49 күн хаалла
Бэс ыйын 4-9 күннэригэр, Нам улууһугар Саха сирин үөрэнээччилэрин II-с Спартакиадата ыытыллаары турар. Оҕону спорт эйгэтигэр көҕүлүүр соруктаах улахан далааһыннаах тэрээһини анал хамыыһыйалардаах Дирекцияны кытта сэргэстэһэ улуус култууратын эйгэтэ арыаллыыр.
Саха сиригэр Оҕо сыла
Нам улууһугар Оҕо спордун сыла
Улуус айар куттаах эр дьоно Дьокуускай олохтоохторугар Эҥсиэли хочотуттан ыллам ырыаларын анаатылар. Ол курдук, Петр Попов, Кэскил Баишев, Дьулурҕан Харитонов, Илларион Пестерев, Владимир Власов, Петр Машников, Афанасий Семенов, Радомир Лиханов, Андрей Слепцов, Николай Протопопов, Дмитрий Барабанов, Ким Осипов, «Добун», «Дуорай», «Махсыым уолаттара» эр дьон ансаамбыллара кыттыыны ыллылар.
Ыытааччы Александр Дьяконов кэлбит көрөөччүлэргэ Нам улууһун нэһилиэктэриттэн кэлбит ахтылҕаннаах минньигэс кэһиилэри оонньотто. Улуус волонтер ыччата тэрээһиҥҥэ хас кэлбит ыалдьыты үөрэ-көтө көрүстэ, аҕам саастаах дьону арыаллаата.
Ю.А. Гагарин аатынан Култуура уонна аныгы искусство Киинигэр улууспут уран тарбахтаах уустарын, иистэнньэҥнэрин үлэлэрэ, Намнааҕы Кииннэммит библиотека Нам улууһун кэрэһэлиир кинигэлэрэ көрдөрүүгэ турдулар. Ону сэргэ, иҥэмтиэлээх ас-үөл арааһа, эмтээх оттор дьаарбаҥкаҕа үгүс киһи интэриэһин тартылар.
Бу курдук, хатыламмат дьоро киэһэттэн Дьоллоох Дьокуускай олохтоохторо биир дойдулаахтарын кытта ахтылҕаннаах көрсүһүүлэриттэн, киһи эрэ истэ олоруох ырыалартан дууһалыын астынан, илии тутуурдаах, өттүк харалаах тарҕастылар.
