Сэтинньи 21 күнүгэр П.П.Ядрихинскай-Бэдьээлэ аатынан Олоҥхо дьиэтигэр Нам улууһугар Олоҥхо декадатын арыллыыта үөрүүлээх быһыыга-майгыга ыытылынна.
Кэлбит бар дьоммутугар Владимир Сыромятников сырдык санаатын, алгыс сиэрин-туомун нөҥүө үтүө тылын тириэртэ.
«Нам улууһа» МТ баһылыгын солбуйааччыта Филипп Николаев, «Ленскэй нэһилиэк» МТ баһылыгын солбуйааччыта Тимофей Охлопков, Нам улууһун култуураҕа уонна Духуобунай сайдыыга управлениетын начальнига Семен Ядрихинскай олоҥхо өрөгөйдөөх күнүн айхаллаан эҕэрдэ тылы анаатылар.
Улууспут нэһилиэктэрин олоҥхо толорооччулара Кыһыл дэриэбинэттэн Лия Парникова, Намтан Сигуна Карамзина, Ваня Винокуров, Владимир Сыромятников, Вера Цыпандина, Хамаҕаттаттан Оксана Кудрина, Көбөкөнтөн Станислав Дмитриев, Бастакы Хомустаахтан Елена Руфова күргүөм олоҥхону толорон устар ууну сомоҕолоотулар, тохтор тойугу доллоһуттулар. Олоҥхоҕо буоларын курдук орто дойду айыллыыта, бухатыыр төрөөһүнэ, дьоно — сэргэтэ, аллараа дойду абааһылара хоһуйулуннулар.
Иккис чааһыгар төрүт дорҕоон бөлөхтөрө Хатыҥ-Арыы нэһилиэгиттэн «Дорҕоон» этно- (сал. Степан Находкин), «Дуораан» (сал.Нюргуяна Адамова), Намтан «Эдэр тэтим» (сал.Сандр Находкин), Хамаҕаттаттан «Иэмэх» (сал. Оксана Кудрина) фольклорнай бөлөхтөр, А.Ф. Шестаков аатынан Улуустааҕы норуот айымньытын дьиэтин иһинэн тэриллибит «Сарыада», «Намылы» ырыа фольклорнай бөлөхтөр уонна биирдиилээн толорооччулар Партизан нэһилиэгиттэн Мария Аргунова, Намтан Вера Цыпандина дэгэрэҥ ырыаны бэлэх ууннулар.
«Нам-кылыһах» төрүт дорҕоон бөлөҕө (сал.Мария Григорьева) ырыаларга доҕуһуоллаан, саха кута-сүрэ ырааһырар алгыстаах дириҥ түһүлгэлээх тэрээһини киэргэттилэр.
Түмүккэ — Мария Аргунова оһуохайы оройуттан тутта, эһиэкэйи эҥээриттэн ылла.
Эриэккэс тыл кэрэтэ этиллэр, үтүө тыл үтүмэнэ түстэнэр үөрүүлээх күнү иилээн-саҕалаан тэрийдилэр А.Ф. Шестаков аатынан Улуустааҕы норуот айымньытын дьиэтин фольклорга специалистара Вера Цыпандина, Мария Григорьева-Маайа.
