Алтынньы 26 күнүттэн саҕалаан оскуолаларга быйылгы үөрэх дьылыгар бастакы сынньалаҥнар саҕаланнылар. Сэргэх, туһалаах буоллун уонна туох эрэ саҥа арыйыыны аҕаллын диэн туран, А.Ф. Шестаков аатынан Улуустааҕы норуот айымньытын дьиэтэ И.С. Гаврильев аатынан Намнааҕы1№ орто скуолатын үөрэнээччилэригэр «Большая перемена» үөрэтэр, билиһиннэрэр, сынньатар соруктаах тэрээһини ыытта.
Ол курдук, күнүс 14.00 чаастан саҕалаан, оскуола библиотекатыгар тэрийэр-методическай отдел сэбиэдиссэйэ Туяра Петрова үөрэнээччилэри кытта көрсөн Пушкинскай карта туһунан кэпсээтэ, «Мои документы» араас өҥөлөөх киин специалиһа Юлия Посельская 8-11 кылаас үөрэнээччилэригэр докумуону судаарыстыбаннай өҥөлөр сигэлэригэр киллэриигэ уонна бигэргэтиини ааһалларыгар көмөлөстө. Оҕолор Пушкинскай каартанан култуурнай тэрээһиннэргэ хайдах билет ыларга үөрэннилэр, олоххо туһалаах сигэлэри биллилэр.
Салҕыы, уоту-күөһү туруоран, музыканы холбоон көрдөөх оонньуулаах үҥкүү-ырыа дьоро киэһэтэ саҕаланна. Ыытааччы Валерий Дороманов оҕолор биһириир өрүттэрин таба таайан, олус үчүгэйдик биир долгуҥҥа туран ыытта. Сонун оонньуулар, араас сатабылга күрэхтэр ыытылыннылар, хас биирдии кыттыбыкка үөрэххэ туһалаах бэлэхтэр туттарылыннылар. Оҕолор сөбүлээн истэр музыкаларынан сөп түбэһэ хамсанан, тэҥҥэ ыллаһан, астына үҥкүүлээтилэр. Артем Дьяконов гитаралаах ырыатын долгураҥынан саалаҕа өрүкүйбүт уоҕу сымнатта, сүрэх-дууһа тэҥҥэ ыллаһан төлөпүөн фонаарынан «сүүһүнэн сулустар вальстаатылар».
Ханна даҕаны сырытталлар, оҕо аймах идэтин таларыгар улахан дьон үлэтин көрөр. Ол курдук, ди-джей идэтин билиэн баҕалаах уолаттар улахан аппаратураҕа бэйэлэрин фонотекаларынан үҥкүүнү ыытан дуоһуйдулар, салҕыы Николай Кривошапкин салайар техническай отделы кытта тэҥҥэ үлэлэһэргэ, араас ньымаларга үөрэнэргэ сүбэлэстилэр. Бу курдук, култуура эйгэтэ инникитин үүнэр көлүөнэни иитиигэ, идэҕэ, үлэҕэ бэриниилээх уонна эппиэтинэстээх буоларга үөрэннилэр, саҥаны арыйан, сүргэлэрэ көтөҕүллэн бастакы чиэппэр сынньалаҥар тарҕастылар.
