Алтынньы 14 күнүгэр, Нам улууһун Түбэ нэһилиэгин күнүн чэрчитинэн, М.К. Аммосов аатынан Култуура уонна духуобунай сайдыы Дыбарыаһыгар киэҥ далааһыннаах тэрээһин буолан ааста.
«Ытык Эбэбит Үрүҥ-Күөл күндү бэлэҕэ — собо» Түбэ нэһилиэгин талааннаах тарбахтаахтарын быыстапката улууспут олохтоохторун уонна ыалдьыттарын манньытта.
Түбэттэн төрүттээх талба талааннаахтар, нэһилиэк олохтоохторо кыттыылаах «Уруйдан-айхаллан, Түбэм Сирэ!» уус-уран самодеятельнай кэнсиэрэ көрөөччү сүргэтин көтөхтө. Киирии билиэтинэн бааттаах көрөөччүлэр Түбэ сирин быйаҥыттан бэлэх туттулар.
