Балаҕан ыйын 29 күнүгэр, Нам улууһун култууратын ветераннара дьоро киэһэҕэ муһуннулар. Тэрээһин Аан дойдутааҕы Аҕам саастаах дьонун декадатын чэрчитинэн ыытылынна.
Үөрүүлээх көрсүһүүнү Нам улууһун култуура эйгэтин үлэһиттэрин Идэлээх сойууһун председателя Александра Алексеевна Парникова уонна улууспут култууратын ветераннарын Сэбиэтин председателя Раиса Николаевна Горохова эҕэрдэ тылларынан арыйдылар.
Ыллым ырыа аргыстаах, эймэнитэр үҥкүү үктэллээх дьоро киэһэни үгүс көрөөччү-истээччи кутун-сүрүн туппут, ССРС култууратын туйгуна, СӨ култууратын Үтүөлээх үлэһитэ Людмила Дмитриевна Рехлясова иилээн-салайан ыытта.
Эҕэрдэ эриэккэһэ этилиннэ, хоһоон хомоҕойо ааҕылынна, дууһаны манньытар ырыалар ылланнылар, сүрэҕи өрүкүтэр эдэр саас умнуллубат үҥкүүлэрэ тэлээрдилэр. Дьон-сэргэ сөбүлээн истэр ырыаһыта, ыытааччыта Афанасий Татаринов баяҥҥа доҕуһуоллаан киэргэттэ, бэйэтин ырыаларын анаан сүргэни көтөхтө.
Итии үүттээх чэйдээх, минньигэс, тотоойу ас арааһа остуол хотойорунан тардылынна. Биһиги ветераннарбыт, дьоҥҥо-ыччакка анаабыт түбүктээх үлэлэрин таһынан, ас амтаннааҕын астыылларын бу дьоро киэһэҕэ көрдөрдүлэр. Ол курдук, кэлбит ветераннар ортолоругар бүлүүдэ күрэҕэ ыытылынна. Ону сэргэ, хас биирдии кэлбит ветеран араас көрдөөх оонньууларга көхтөөхтүк кыттан бириис тутта.
Ытыктабыллаах Аҕам саастаах коллегаларбыт — Елена Александровна, Дмитрий Порфирьевич, Ольга Афанасьевна, Людмила Дмитриевна, Ольга Алампадьевна, Максим Кириллович, Светлана Николаевна!
Эһиэхэ, Аан дойдутааҕы Аҕам саастаах дьон күнүнэн ис-сүрэхтэн истиҥ эҕэрдэбитин тиэрдэбит!
Үлэҕэ, идэҕэ бэриниилээх, айар куттаах, тэрийэр, түмэр дьоҕурдаах, олоххо өрүү кэрэни кэрэхсэтэр, үтүөнү үксэтэр, сырдык, холку майгылаах биһиги холобур оҥостор аҕа саастаах коллегаларбытыгар баҕарабыт саха алмааһыны кытаанах доруобуйаны, чугас дьоҥҥут, доҕотторгут тапталларынан, ытыктабылларынан кынаттанан уһуннук, дьоллоохтук олоруҥ!
