Балаҕан ыйын 27 күнэ — Саха Өрөспүүбүлүкэтин Судаарыстыбаннаһын күнэ. Дириҥ суолталаах күнү Нам улууһун А.Ф. Шестаков аатынан Улуустааҕы норуот айымньытын дьиэтэ тэрээһиннээхтик бэлиэтээтэ.
Өрөгөйдөөх күнүнэн Ленскэй нэһилиэк киин болуоссатыгар биир дойдулаахпыт, уһулуччулаах государственнай уонна политическай деятель Максим Кирович Аммосов памятнигар тыыннаах сибэкки дьөрбөтө уурулунна.
Манна кыттыыны ыллылар — И.С. Гаврильев аатынан Нам 1№ орто оскуолатын 3 Б кылааһын үөрэнээччилэрэ, кылаас салайааччыта Марианна Рожина, Намнааҕы народнай театр ыччат бөлөҕүн кыттааччылара, нэһилиэк олохтоохторо. «Нам улууһа» МТ баһылыгын социальнай үлэҕэ солбуйааччыта Мария Игнатьева өрөгөйдөөх күнүнэн тыл этэн арыйда. Салгыы, «Ленскэй нэһилиэк» МТ баһылыга Петр Сокольников, «Нам улууһа» МТ депутаттарын Сэбиэтин аатыттан депутат Светлана Поротова чулуу дьоммут саха норуотун көҥүлүн туһугар кэриэстээн хаалларбыт олох тутулун ситэрэн, инники кэккэҕэ сайда-чэчирии, түмсэ, өйөһө туруоҕуҥ, хас биирдии дьиэ кэргэҥҥэ толору дьол тосхойдун диэн эҕэрэдэлээтилэр.
