Бүгүн, от ыйын 4 күнүгэр, М. К. Аммосов аатынан киин болуоссатын тыа хаһаайыстыбатын эйгэтигэр күүс буолар сабыс-саҥа тимир көлөлөр кэчигирээн толордулар.
Үөрүүлээх тэрээһини Нам чаҕылхай ырыаһыттарыттан биирдэстэрэ Анна Слепцова ылбаҕай ырыатынан арыйда.
Үөрүүлээх тэрээһиҥҥэ «Нам улууһа» МТ баһылыга Юрий Иннокентьевич Слепцов, СӨ Тыатын хаһаайыстыбатын миниистирэ Александр Павлович Атласов, «Нам улууһа» МТ дьаһалтатын Тыатын хаһаайыстыбатын салаатын начальнига Владимир Иванович Макаров эҕэрдэлээтилэр.
Итиэннэ, Үөдэй, Хомустаах Бастакы, Хамаҕатта, Хатыҥ-Арыы, Бөтүҥ, Модут, Хатырык нэһилиэктэрин бааһынай хаһаайыстыбаларын, кооперативтар салайааччыларыгар, урбаанньыттарга сабыс-саҥа кэлбит МТЗ тыраахтардар күлүүстэрин, тыа хаһаайыстыбатын техникэлэрин (комбайн, пресс-сборщик, пресс-подборщик, плуг) сибидиэтэлистибэлэрин туттардылар.
Ол курдук, 19 техника Нам улууһугар Саха Өрөспүүбүлүкэтин, Нам улууһун бүдьүөттэриттэн көрүлүннүлэр. Саҥа тимир көлөлөр хаһаайыттара барҕа махталларын эттилэр. Саха Өрөспүүбүлүкэтин Ил Дарханыгар Айсен Сергеевич Николаевка, Саха Өрөспүүбүлүкэтин Ил Түмэн Судаарыстыбаннай мунньаҕын председателыгар Алексей Ильич Еремеевка, Нам улууһун баһылыгар Юрий Иннокентьевич Слепцовка өйөбүллэрин, көмөлөрүн, былаан олоххо киирэригэр төһүү күүс буолалларыгар барҕа махталларын тиэртилэр.
