Кулун тутар 29 күнүгэр А.Ф. Шестаков аатынан улуустааҕы норуот айымньытын дьиэтигэр, Аан дойдуга Театр күнүн чэрчитинэн, режиссер И.Новиков көҕүлээһининэн көр-күлүү киэһэтэ буолан ааста. Концертка улууспут самодеятельнай театрдарын коллективтара, Намнааҕы народнай театр артыыстара кыттыыны ыллылар.
Дьээбэлээх-хооболоох, күлүү аргыстаах дьээбэрэҥ киэһэтэ бэрт сэргэхтик ааста. Хас биирдии кыттыбыт артыыс оруолун толору арыйан көрөөччү биһирэбилин ылла.
Бу курдук, көрөөччүлэр санааларын үлэһиннилэр:
“Бэҕэһээ көр-күлүү киэһэтигэр “Чэчир” уһуйаан коллектива бары сырыттыбыт. Ыытааччы Иван Новиков кэрүдьүөс тылларынан дьээбэлэнэн кэрэ күлүү киэһэтэ ааста. Биһиги коллективпыт үлэһиттэрэ оруолларга киирэн көхтөөхтүк кытыннылар.
Бука бары оруолларын хас биирдии кэлбит коллектив сүрдээҕин оонньоотулар. Сыҥаахпыт ыалдьыар диэри күлэн тарҕастыбыт.
Дыбарыас үлэһиттэрэ техсредствану, саҥа көрүҥү баһылаабыттар. Хас биирдии сценкаҕа болҕомто уурбуттар. Инники өттүгэр саҥа ааттар тахса турдуннар. Дьээбэлээх ырыалар, күлүүлээх хоһооннор, чабырҕахтар, үгэлэр, көрүдьүөс үҥкүүлэр. Дьоҥҥо кэрэ сынньалаҥы бэлэхтээбиккитигэр “Чэчир” детсад коллективыттан истиҥ махтал. Сайда, үүнэ туруҥ!”
Көрөөччү алгыс тылын анаата:
“Эстэ-эстэ тиллэр, быста-быста салҕанар, көр-күлүү кэмиэдийэ жанрбыт бүөбэйин тута сылдьар күндү күлүүк доҕотторбут! Норуоппут таптыыр, кэтэһэр, биһириир көрдөөх сценкаларгытын айа-тута сылдьаргытын үрдүктүк сыаналыыбыт, көрүдьүөстээх түгэннэргитин көмүскэ тэҥниибит! Баҕарабыт уҕараабат айымньыгыт мэлдьи айылла сылдьыаҕын, көрөөччү таптала өрүү күөдьүйэ туруохтун! Махтал буоллун эһиэхэ!
Туругурдун көр-күлүү жанрбыт, норуот таптыыр кэмиэдьийэбит!”
“20-чэ сыл тохтоон баран “Кычык-кычык” мини-театр тиллибитинэн тэрийээччи И.С.Новиковка эҕэрдэ! Өссө да сылын аайы тохтообокко иннин диэки дьүккүйэн баран ис!”
