Бүгүн Н. М. Рыкунов аатынан Улуустааҕы кииннэммит библиотекаҕа үтүө үгэскэ кубулуйбут «Ааҕыы толооно» литературнай-интеллектуальнай оонньуу буолан ааста. Оонньууну Н. М. Рыкунов аатынан Улуустааҕы кииннэммит библиотека Ааҕар саалатын библиотекара, СӨ кульуратын туйгуна Александра Парникова иилээн-саҕалаан, тэрийэн ыытта. Россияҕа Педагог уонна наставник сылыгар олоҕуран, быйылгы оонньууга оҕону кэрэҕэ уһуйар, айар үлэҕэ дьарыктыыр Нам улууһун Искусства оскуолатын педагогтара хамаанданан кытыннылар. Ол курдук, үстүү киһилээх биэс хамаанда биэс түһүмэххэ күөн көрүстүлэр. Өй-билии тургутуутун сиэринэн саха тылын уонна суругун-бичигин эйгэтиттэн араас тэттик ыйытыыларга хоруйдаатылар, айымньылары таайдылар, латыынныы суруллубут кинигэттэн мүнүүтэҕэ аахтылар.
Дьүүллүүр сүбэҕэ П. П. Ядрихинскай-Бэдьээлэ аатынан Олоҥхо дьиэтин методиһа Гликерья Николаева уонна Н. М. Рыкунов аатынан Улуустааҕы кииннэммит библиотека библиотекара Татьяна Михайлова олордулар, хас биирдии хамаанда толорбут сорудаҕын хоруйдарын аахтылар. Кимиилээх, өрө күүрүүлээх киирсии, көрдөөх түгэннэрдээх оонньуу түмүгэр 1-Хомустаах нэһилиэгин филиалын «Чыпчаал» хамаандата бастаата уонна «Ааҕыы толооно» оонньуу кыайыылаах дипломунан, туоһу суругунан, проект ааптара Наталья Петрова туруорбут сүрүн бирииһинэн — 1000 солк суммалаах сертификаттарынан наҕараадаланнылар. Иккис миэстэҕэ Хамаҕаттатааҕы филиал «Ситим» хамаандата тахсан анал дипломунан, харчылаах сертификаттары туттулар. Үһүс бочуоттаах миэстэ «Тэгил» хамаанда буолла уонна дипломунан, кинигэлэринэн наҕараадаланна. «Сайдыы» уонна «Дьулуур» хамаандалара туоһу суруктары кытта хас биирдиилэрэ сиэдэрэй блокноттарынан биһирэннилэр. Олус сэргэх, билиини эбинэр хабааннаах литературнай-интеллектуальнай оонньуу бары кыттааччылара сүргэлэрэ көтөҕүллэн, бириэмэни туһалаахтык атаардылар, ситиһии, бириис тутан, астынан тарҕастылар.
Өссө төгүл, төрүт сахабыт тылын үйэтитэр, саха суруйааччыларын айымньыларынан аартыктары арыйар тэрээһиҥҥэ кыттыбыт биир идэлээхтэрбитигэр эриэккэс эҕэрдэбитин, барҕа махталбытын тиэрдэбит. Дойдуга биллэриллибит Педагог уонна наставник сылынан айар-үөрэтэр үлэҕитигэр өссө үрдүк ситиһиилэри, саҥа арыйыылары баҕарабыт.
«Ааҕыы толооно» литературнай-интеллектуальнай оонньуу көҕүлээччитэ
Саха Өрөспүүбүлүкэтин культуратын туйгуна Наталья Петрова
