Олунньу 22 күнүгэр П.И. Сивцев аатынан Намнааҕы история уонна этнография музейа саҥа Дыбарыаска киирбит үлэтин үөрүүлээх арыллыыта уонна 55 сыллаах юбилейын бэлиэтиир күнэ буолла. Өбүгэлэрбит урукку олохторун сээркээн сэһэнньиттэр, хомоҕой тыллаах олоҥхоһуттар үйэтитэр буоллахтарына, аныгы дьон музей дьиэлэрин тутан, историяны өлбөт үйэлииллэр, ыччакка, кэлэр кэнчээригэ үтүө дьыаланы оҥороллор. Тэрээһин Петр Охлопков алгыс сиэрин-туомун толоруутунан, Артур Семенов – Тоҥ Саха хомуска доҕуһуолунан саҕаланна.
П.И. Сивцев аатынан Намнааҕы история уонна этнография музейа үөрүүлээх арыллыытыгар аалай кыһыл лиэнтэни «Нам улууһа» муниципальнай тэриллии баһылыга Ю.И. Слепцов, Саха Өрөспүүбүлүкэтин култуураҕа уонна духуобунай сайдыыга министрин бастакы солбуйааччыта А.И. Ноев, П.И. Сивцев аатынан Намнааҕы история уонна этнография музейын директора А.И. Копырин быстылар.
Бүгүҥҥү үөрүүлээх күҥҥэ Василий Ущницкий-Сэки тылыгар, Андрей Замятин мелодиятыгар, Сергей Акимбетов аранжировкатыгар «Музей гимнын» П.И. Сивцев аатынан Намнааҕы история уонна этнография музейын, И.Е. Винокуров аатынан Хатыҥ Арыытааҕы история уонна кыраайы үөрэтэр музейын, И.С. Шарапов аатынан Никольскайдааҕы сири туһаныы музейын үлэһиттэрэ толордулар.
Экспонат туттарбыт ыалдьыттарга А.Т. Замятиҥҥа, И.В. Осиповка, Д.И. Ноговицыҥҥа махтал тылларын эттилэр.
Музей тэриллиэҕиттэн үлэлээн ааспыт директордар: Афанасий Федорович Шестаков, Елизавета Дмитриевна Петрова, Айталина Петровна Павлова, Светлана Егоровна Охлопкова, Иннокентий Захарович Кривошапкин ахтылыннылар. 2008 сылтан музей директорынан Александр Иванович Копырин ананан үлэлии-хамсыы сылдьар.
2010 сылтан музей киновидеорхива улуус кинолетопиһын өссө кэҥэтэр сыаллаах тэриллэн урукку кэм чулуу дьоннорун, историялар чахчыларын кэрэһэлиир хаартыскалар, видео устуулар хараллан мунньуллан, архивы туһанан араас документальнай киинэлэр оҥоһуллан сылын аайы Кыайыы күнүгэр Киин телевиденияҕа уонна НВК «Саха» канаалларга көстө.
Үөрүүлээх быһыыга истиҥ-иһирэх эҕэрдэ уонна махтал тыллары «Нам улууһа» муниципальнай тэриллии баһылыга Ю.И. Слепцов, Саха Өрөспүүбүлүкэтин култуураҕа уонна духуобунай сайдыыга министрин бастакы солбуйааччыта А.И. Ноев, «Нам улууһа» муниципальнай тэриллии култуураҕа уонна духуобунай сайдыыга управлениетын начальнига С.П. Ядрихинскай, «Ленскэй нэһилиэк» муниципальнай тэриллии баһылыга П.Г. Сокольников, Нам улууһун култуура үлэһиттэрин идэлээх Сойууһун комитетын председателя А.А. Парникова, Емельян Ярославскай аатынан Саха музейын директорын солбуйааччыта А.М. Ховров, «Моя Россия» музей эппиэттээх үлэһитэ В.Б. Борисов, Россия журналтистарын Сойууһун чилиэнэ В.Г. Касьянов, Улуустааҕы үөрэҕирии управлениетын начальнига Е.В. Ядреева, Нам 2-с нүөмэрдээх оскуолатын диретора Н.П. Никонова, Н.С. Охлопков аатынан Нам улууһун гимназиятын директора А.В. Новгородов, И.С. Гаврильев аатынан Нам 1 нүөмэрдээх оскуолатын директора Н.Г. Парников, И.Д. Винокуров-Чаҕылҕан аатынан Нам алын сүһүөх оскуолатын завуһа А.И. Ядрихинская, музей аатын сүгэр Петр Иннокентьевич Сивцев аймахтара, А.В. Мигалкин, «Көмүөл» кинигэ кыһатын салайааччыта Б.И. Павлов, «Копир+» тэрилтэ салайааччыта Б.Г. Новгородов, Улуус култууратын салайааччылара: Н.М. Жирков, М.Р. Софронова уонна Улуус Аҕа түмсүүтүн председателя В.В. Сыромятников эттилэр.
Күндү музей үлэһиттэрэ, урукку дьыллар уорҕаларын уонна кэлэр кэм саһарҕатын ситимниир, норуоппут култууратын, историятын үйэтитэр аналлаах, үүнэр ыччакка утуму салгыыр, үтүө үгэстэри иитэр сыаллаах айымньылаахтык, уҕараабат эрчиминэн үлэлии-хамсыы сылдьыҥ, ылсыбыккыт сыыйа-баайа ыпсан, саҕалаабыккыт сатанан, уурбуккут-туппуккут барыта биллэр-көстөр үтүө түмүктэнэн истин! Мэлдьи ситиһии эрэ эҥээрдэстин!
